لیاری گینگ وار پر بنائی گئی بولی وڈ فلم ’دُھرندھر‘ بھارتی سنیما گھروں میں ریلیز

ممبئی: لیاری گینگ وار کے اوپر فلمائی گئی بولی وڈ فلم ’دُھرندھر‘ بھارتی سینما گھروں میں ریلیز کر دی گئی ہے۔

تفصیلات کے مطابق ادیتیا دھار کی ہدایت کاری میں بننے والی اس فلم میں رنویر سنگھ کے ساتھ سنجے دت، ارجن رام پال، اکشے کھنہ، آر مدھون اور سارہ ارجن جیسے اداکار اہم کرداروں میں نظر آئیں گے۔

بھارتی نیوز چینل انڈیا ٹوڈے کے مطابق دھرندھر کی پریس اسکریننگز 4 دسمبر کو دہلی اور ممبئی میں طے کی گئی تھیں، لیکن تکنیکی خرابیوں کی وجہ سے ان کو منسوخ کر دیا گیا،دیپیکا پڈوکون نے اپنے شوہر رنویر سنگھ کی فلم دھرندھر کی تشہیر کے لیے 4 دسمبر کو سوشل میڈیا پر ایک پوسٹ شیئر کی، جس میں ان کی کامیابی کے لیے نیک خواہشات کا اظہار کیا۔

سارہ ارجن، جو اداکار راج ارجن کی بیٹی ہیں، فلم دھرندھر میں رنویر سنگھ کے ساتھ رومانوی کردار میں نظر آئیں گی۔ سارہ نے اپنے کیریئر کا آغاز چھوٹی عمر میں کیا تھا اور وہ پہلے ہی کئی معروف تجارتی اشتہارات اور فلموں میں نظر آ چکی ہیں۔

دوسری جانب فلم ’’دھرندھر‘کو ’اے‘ سرٹیفیکیٹ دیا گیا ہے اور اس کا دورانیہ 3 گھنٹے 34 منٹ ہے، جو گزشتہ 17 سالوں میں کسی بالی وڈ فلم کا سب سے طویل دورانیہ ہے۔ یہ رنویر سنگھ کی پہلی ’اے‘ سرٹیفیکیٹ والی فلم ہے۔

خیال رہے کہ فلم کی کہانی حقیقی واقعات، جغرافیائی تنازعات اور بھارتی فوج کی خفیہ آپریشنز کے پس منظر پر مبنی ہے۔