مسلسل اضافے کے بعد سونے کی قیمت میں کمی، فی تولہ کتنے کا ہو گیا؟

کراچی :گزشتہ کئی دن سے عالمی و مقامی مارکیٹوں میں سونے کی قیمت میں مسلسل اضافہ ہو رہا تھا، تاہم آج منگل کے روز سونے کی قیمت میں معمولی کمی ہوئی ہے۔

آل پاکستان جیمز اینڈ جیولرزایسوسی ایشن کے مطابق کاروباری ہفتے کے دوسرے روزمقامی مارکیٹوں میں سونے کے فی تولہ نرخ میں 1500 روپے کی کمی ہونے سے نئی قیمت 5 لاکھ 30 ہزار 562 روپے ہو گئی ہے۔

ایسوسی ایشن کے مطابق اسی طرح دس گرام سونا 1286 روپے سستا ہونے سے نئی قیمت 4 لاکھ 54 ہزار 871 روپے ہوگئی ہے۔

سونے کی قیمت کے برعکس چاندی کی قیمت میں اضافہ ہوا ہے، چاندی 212 روپے مہنگی ہوئی ہے جس کے بعد قیمت 11640 روپے کی بلند ترین سطح پر پہنچ گئی ہے۔

دوسری جانب عالمی بلین مارکیٹ میں سونے کے نرخ میں 15 ڈالر کی کمی ہوئی ہے جس کے بعد فی اونس سونا 5082 ڈالر کا ہو گیا ہے۔

خیال رہے کہ گزشتہ روز سونے کے نرخ میں 10 ہزار 900 روپے کا اضافہ ہوا تھا جس کے بعد سونے کی قیمت بلند ترین سطح پر چلی گئی تھی۔