وزیراعظم کی ذیابیطس کی روک تھام کیلئے جامع حکمت عملی وضع کرنے کی ہدایت

اسلام آباد : وزیراعظم شہباز شریف نے ملک بھر میں ذیابیطس کی روک تھام کیلئے جامع اور موثر حکمت عملی وضع کرنے کی ہدایت کی ہے۔

انہوں نے یہ بات ملکی اور بین الاقوامی ماہرین امراض غدود اور ذیابیطس کے وفد سے گفتگو میں کہی جس نے آج اسلام آباد میں ان سے ملاقات کی۔

وزیراعظم نے کہا کہ ذیابیطس کے بڑھتے ہوئے مسئلے سے نمٹنے کیلئے علاج کے ساتھ ساتھ اس بیماری کی روک تھام کو ترجیح دینا وقت کی ضرورت ہے۔

انہوں نے نوجوانوں، خصوصاً کالجوں اور جامعات کے طلبہ میں صحت مند طرز زندگی کو فروغ دینے کیلئے موثر اقدامات کرنے کی بھی ہدایت کی۔

وزیراعظم نے متوازن غذا، باقاعدہ جسمانی سرگرمیوں اور صحت مند طرز زندگی کی عادات اپنانے کے بارے میں قومی سطح پر عوامی آگاہی بڑھانے کی ضرورت پر زور دیا۔

انہوں نے کہا کہ ذیابیطس سے بچائو، اس کی بروقت تشخیص اور صحت مند طرز زندگی سے متعلق آگاہی ٹیلی ویژن، ریڈیو، ڈیجیٹل پلیٹ فارمز اور ابلاغ کے دیگر ذرائع سے عام کی جائے۔

شہباز شریف نے کہا کہ ذیابیطس کی روک تھام کے لیے قومی ترجیحات کے مطابق واضح پالیسی اور قابل عمل منصوبہ بندی ضروری ہے اور متعلقہ اداروں کو تحقیق، آگاہی اور احتیاطی اقدامات کے حوالے سے مربوط حکمت عملی وضع کرنی چاہیے۔

انہوں نے کہا کہ ذیابیطس کے بڑھتے ہوئے مسئلے سے موثر انداز میں نمٹنے کے لیے علاقائی اور بین الاقوامی تعاون کو فروغ دینا ضروری ہے۔

وزیراعظم نے ہدایت کی کہ بین الاقوامی تجربات، تحقیق اور بہترین طریقوں سے استفادہ کرتے ہوئے ملک میں بیماریوں کی روک تھام کے اقدامات کو مزید موثر بنایا جائے۔