معروف اداکار رانا آفتاب نامعلوم افراد کی فائرنگ سے جاں بحق

لاہور کے تھانہ چوہنگ کے قریب سابق ایکسائز آفیسر اور ٹی وی ، فلم کے اداکار رانا آفتاب احمد نامعلوم افراد کی فائرنگ سے جاں بحق ہو گئے۔

پولیس نے مقتول کی بیوی کی مدعیت میں 4 نامعلوم افراد کے خلاف مقدمہ درج کر لیا ، مقتول کی بیوی نے بتایا کہ شوہر دفتر جانے کے لیے گھر سے نکلے تو گھر کے باہر پہلے سے موجود گاڑی میں 3 سے 4 نامعلوم افراد سوار تھے ایک نے اتر کر اندھا دھند فائرنگ کی۔

پولیس حکام کے مطابق لاش پوسٹ مارٹم کے لیے بھیج کر قانونی کارروائی کا آغاز کردیا گیا ہےجبکہ ، ان کی نماز جنازہ کا اعلان تاحال نہیں ہوا، رانا آفتاب ایکسائز افسر بھی رہے اور چند سال قبل ہی ریٹائرڈ ہوئے۔

خیال رہے کہ رانا آفتاب نے بے شمار ڈراموں اور فلموں میں کام کیا، ان کے مشہور ڈراموں میں  لال آندھی، لاگ، رکھوالا، ایک محبت آزمائش اور دیگر شامل ہیں۔

انہوں نے اپنی کمال اور لاجواب فطری اداکاری کی بدولت ناظرین کے دلوں میں جگہ بنائی۔

ان کے اچانک اور پرتشدد انتقال پر شوبز انڈسٹری میں گہرے دکھ اور افسوس کا اظہار کیا جا رہا ہے۔ فنکاروں، ہدایتکاروں اور مداحوں کی جانب سے رانا افتاب کے لیے دعائے مغفرت اور لواحقین سے تعزیت کا سلسلہ جاری ہے۔