ایکشن، رومانس اور سسپنس سے بھرپور فلم ’’مینگو جٹ‘‘ ریلیز، پریمیئر میں شوبز ستاروں کی شرکت

عبدالسلام علی سے 

لاہور: لالی وڈ کی نئی پنجابی فلم ’’مینگو جٹ‘‘ سینما گھروں کی زینت بن گئی۔ لاہور کے نجی سینما میں فلم کا رنگا رنگ پریمیئر شو منعقد ہوا، جس میں فلم کی کاسٹ سمیت نامور اداکاروں اور دیگر شوبز شخصیات نے شرکت کی۔

پریمیئر شو میں اداکار فیصل قریشی، حریم فاروق، فہد مصطفیٰ، نیئر اعجاز، حیدر سلطان راہی، قیصر پیا اور دیگر فنکار شریک ہوئے۔ اس موقع پر فلم کے حوالے سے گفتگو کرتے ہوئے اداکارہ حریم فاروق اور اداکار فیصل قریشی نے کہا کہ پنجابی فلموں سے محبت کرنے والے شائقین کے لیے ’’مینگو جٹ‘‘ ایک بہترین تفریح ثابت ہوگی۔

تقریب میں شریک دیگر شوبز شخصیات کا کہنا تھا کہ پاکستانی فلم انڈسٹری میں نئی فلموں، بالخصوص پنجابی فلموں کی تیاری ایک خوش آئند پیش رفت ہے۔ ایسی فلمیں نہ صرف مقامی سینما کو فروغ دیتی ہیں بلکہ علاقائی زبانوں اور ثقافت سے جڑے فن کو بھی اجاگر کرتی ہیں۔

ایکشن، رومانس اور سسپنس کے امتزاج پر مبنی فلم ’’مینگو جٹ‘‘ کی نمایاں کاسٹ میں فیصل قریشی، حریم فاروق، قیصر پیا، حسن مراد اور دیگر اداکار شامل ہیں۔ فلم کی ریلیز کو پنجابی سینما کے فروغ کی جانب ایک نئی پیش رفت قرار دیا جا رہا ہے۔