تھائی لینڈ اور کمبوڈیا کے درمیان ایک بار پھرسرحدی جھڑپیں شروع،کشیدگی میں اضافے کا خدشہ

ویب ڈیسک: جنوبی مشرقی ایشیائی ملک تھائی لینڈ اور کمبوڈیا کے مابین ایک دفعہ پھر سرحدی جھڑپیں شروع ہو گئیں ہیں،جس کے بعد خطے میں کشیدگی میں اضافہ دیکھنے میں آرہا ہے۔

غیر ملکی خبررساں ایجنسی کے مطابق تھائی حکام نے الزام عائد کیا ہے کہ کمبوڈیا نے یکطرفہ طور پرسیزفائرمعاہدے کی خلاف ورزی کی ہے،جس کے نتیجے میں سرحدی علاقوں میں فائرنگ کا تبادلہ ہوا۔

تھائی وزارتِ خارجہ کے مطابق کمبوڈیا کی جانب سے اشتعال انگیزی کے بعد اب فوجی کارروائی جاری رکھی جائے گی۔

اس حوالے سے تھائی وزارت خارجہ کے ترجمان کا کہنا تھا کہ کارروائیاں اس وقت تک جاری رہیں گی جب تک تھائی لینڈ کی خودمختاری اور علاقائی سالمیت کو مکمل طور پرمحفوظ نہیں کرلیا جاتا۔

جبکہ تھائی فوج کے ترجمان کا کہنا ہے کہ کمبوڈین ملٹری نے ہتھیار اور فوجیوں کی تعیناتی میں اضافہ کر دیا ہے، کمبوڈین فوج سے جھڑپوں میں ایک تھائی فوجی ہلاک اور 7 زخمی ہوئے،ان کامزید کہنا ہے کہ ہماری فوج کی جانب سے بھی کمبوڈین حملے کا بھرپور جواب دیا گیا۔

دوسری جانب کمبوڈیا نے بھی سرحدی تناؤ کی ذمہ داری تھائی لینڈ پرعائد کرتے ہوئے مؤقف اپنایا ہے کہ وہ صرف دفاعی اقدامات کر رہا ہے۔

میڈیا رپورٹس کے مطابق صورتحال کشیدہ ہونے کے باعث دونوں ممالک کی سرحد کے قریب آباد شہریوں میں خوف و ہراس پھیل گیا ہے جبکہ کئی دیہات کے رہائشی محفوظ مقامات کی طرف منتقل ہونا شروع ہوگئے ہیں۔

واضح رہے کہ رواں برس جولائی میں بھی تھائی لینڈ اور کمبوڈیا کے درمیان ہونے والی سرحدی جھڑپوں میں درجنوں افراد ہلاک ہوئے تھے۔

تاہم بعدازاں اکتوبر میں امریکی صدر ڈونلڈ ٹرمپ نے ملائیشیا میں ہونے والی آسیان سمٹ کے موقع پر دونوں ممالک کے درمیان سیز فائر کروایا تھا جس پر دونوں ممالک کے رہنماؤں نے باقاعدہ دستخط بھی کیے تھے۔