نکولس مادورو کو فوری رہا کیا جائے، چین کا امریکا سے مطالبہ

بیجنگ: چین نے امریکا سے مطالبہ کیا ہے کہ وہ وینزویلا کے صدر نکولس مادورو اور ان کی اہلیہ کو فوری طور پر رہا کرے اور وینزویلا کے بحران کو طاقت کے بجائے بات چیت اور مذاکرات کے ذریعے حل کیا جائے۔

غیر ملکی میڈیا رپورٹس کے مطابقچینی وزارت خارجہ نے امریکی کارروائی پر شدید تحفظات کا اظہار کرتے ہوئے کہا ہے کہ کسی ملک کے رہنما کو زبردستی گرفتار کر کے ملک سے باہر لے جانا بین الاقوامی قوانین اور سفارتی اصولوں کی خلاف ورزی ہے۔

رپورٹس کے مطابق اتوار کے روز جاری بیان میں چینی وزارت خارجہ نے کہا کہ امریکا کو نکولس مادورو اور ان کی اہلیہ کی ذاتی سلامتی کو یقینی بنانا چاہیے اور انہیں فوری طور پر رہا کیا جانا چاہیے۔ 

وزارت خارجہ کی جانب سے جاری بیان میں کہا گیا کہ اس نوعیت کی کارروائیاں نہ صرف خطے میں عدم استحکام کو بڑھاتی ہیں بلکہ عالمی قوانین اور اقوام متحدہ کے منشور کے منافی بھی ہیں۔

خیال رہے کہ اس سے قبل روس، ایران، کیوبا اور کولمبیا کی جانب سے وینزویلا پر حملے اور صدر نکولس مادورو کی اہلیہ سمیت گرفتاری پر شدید ردعمل دیکھنے میں آیا ہے۔