راہول گاندھی نے ٹرمپ کے بھارتی طیاروں سے متعلق بیان پر مودی حکومت کو آڑے ہاتھوں لے لیا

نئی دہلی: بھارتی اپوزیشن لیڈر راہول گاندھی نے امریکی صدر ڈونلڈ ٹرمپ کی جانب سے 5 بھارتی طیارے گرنے کے بیان پر بھارتی حکومت کو سخت تنقید کا نشانہ بنایا ہے۔

راہول گاندھی نے لوک سبھا اجلاس میں خطاب کرتے ہوئے کہا کہ "اگر مودی میں ہمت ہے تو وہ یہاں آ کر کہے کہ ٹرمپ نے جھوٹ بولا ہے۔" انہوں نے مزید کہا کہ "اگر مودی میں اندرا گاندھی کی طرح حوصلہ ہے تو وہ یہ بتائے کہ ٹرمپ نے جھوٹ بولا ہے اور بھارت نے جنگ بندی نہیں کی، ساتھ ہی یہ بھی بتائیں کہ بھارت کے کوئی طیارے نہیں گرنے تھے۔"

راہول گاندھی کا یہ بیان امریکی صدر کے اس انکشاف کے بعد سامنے آیا ہے، جس میں انہوں نے پاک بھارت جھڑپوں کے دوران 5 بھارتی طیاروں کے گرنے کی تصدیق کی تھی۔ اس کے علاوہ، صدر ٹرمپ 28 مرتبہ پاکستان اور بھارت میں جنگ بندی کے عمل کا کریڈٹ بھی لے چکے ہیں۔

اس وقت بھارتی لوک سبھا میں بھارت کے آپریشن سندور پر بحث جاری ہے، جس میں اپوزیشن کی جانب سے مودی حکومت پر شدید تنقید کی جا رہی ہے۔