مودی حکومت کو ایک اور عالمی جھٹکا، امریکی صدر ٹرمپ نے سکھ فار جسٹس کے رہنما کو خط لکھ دیا

واشنگٹن: بھارتی وزیراعظم نریندر مودی کی انتہاپسند حکومت کو عالمی سطح پر ایک اور سبکی کا سامنا کرنا پڑا ہے۔

امریکی صدر ڈونلڈ ٹرمپ نے مودی حکومت کو سفارتی محاذ پر ایک اور جھٹکا دیتے ہوئے خالصتان تحریک کی حمایت کرنے والی تنظیم سکھ فار جسٹس کے رہنما گرپتونت سنگھ پنوں کو ایک خط ارسال کیا۔

صدر ٹرمپ نے اپنے خط میں امریکی شہریوں کے حقوق اور سلامتی کے لیے اپنی جدوجہد جاری رکھنے کے عزم کا اعادہ کیا۔

خط میں صدر ٹرمپ نے واضح کیا کہ "میں اپنے شہریوں، اپنی قوم اور اپنے اقدار کو سب سے پہلے رکھتا ہوں۔ جب امریکا محفوظ ہوگا، تب ہی دنیا محفوظ ہوگی۔" انہوں نے مزید کہا کہ وہ امریکی شہریوں کے حقوق اور سلامتی کے لیے لڑنا کبھی نہیں چھوڑیں گے۔

سکھ فار جسٹس کے رہنما گرپتونت سنگھ پنوں نے امریکی صدر کی جانب سے بھیجے گئے اس خط کو اپنی ایکس پوسٹ پر شیئر کیا۔