کمشنر پشاور کی زیر صدارت اجلاس، تیراہ کے متاثرین کیلئے ریلیف کی منظوری

ضلع خیبر کی وادی تیراہ میں دہشتگردی کے حالیہ واقعے کے بعد کمشنر پشاور کی زیر صدارت ایک اہم اجلاس منعقد ہوا، جس میں متاثرہ قبائل کو ریلیف فراہم کرنے پر اتفاق کیا گیا۔

جرگہ ذرائع کے مطابق یہ اجلاس ڈپٹی کمشنر آفس میں منعقد ہوا جس میں قبائلی عمائدین کے ساتھ رکن قومی اسمبلی اقبال آفریدی اور رکن صوبائی اسمبلی عبدالغنی نے بھی شرکت کی۔

اجلاس میں جماعت اسلامی، عوامی نیشنل پارٹی (اے این پی) اور پاکستان تحریکِ انصاف (پی ٹی آئی) کی مقامی قیادت بھی شریک رہی، جہاں وادی تیراہ میں دہشتگردی سے متاثرہ خاندانوں کے لیے امدادی اقدامات پر تفصیلی غور کیا گیا۔

ذرائع نے بتایا کہ مذاکراتی عمل کے دوران فیصلہ کیا گیا کہ وادی تیراہ کے نمائندہ عمائدین پر مشتمل ایک جرگہ جلد وزیراعلیٰ خیبرپختونخوا سے ملاقات کرے گا تاکہ متاثرہ افراد کو فوری ریلیف اور طویل المدتی معاونت فراہم کی جا سکے۔

یاد رہے کہ گزشتہ روز وزیراعظم شہباز شریف نے تیراہ کے علاقے باغ میدان میں دہشتگردوں کی فائرنگ سے پرامن شہریوں کی شہادت پر افسوس کا اظہار کیا تھا۔

وزیراعلیٰ خیبرپختونخوا علی امین گنڈاپور نے بھی واقعے پر گہرے دکھ کا اظہار کرتے ہوئے کہا کہ حکومت متاثرین کے ساتھ کھڑی ہے۔ انہوں نے جاں بحق افراد کے لواحقین کے لیے ایک ایک کروڑ روپے اور زخمیوں کے لیے 25، 25 لاکھ روپے امدادی پیکیج کا اعلان کیا۔