پاکستان ڈیجیٹل اثاثوں کے ضابطے میں عالمی ماڈل بننے کا خواہاں ہے،بلال

پاکستان ورچوئل ایسٹس ریگولیٹری اتھارٹی کے چیئرمین بلال بن ثاقب نے کہا ہے کہ پاکستان نے پہلی بار عالمی تبادلے کے لیے ایک منظم، شفاف اور عالمی سطح پرمؤثر راستہ کھولا ہے۔

انہوں نے اسلام آباد میں ایک پریس بریفنگ سے خطاب کرتے ہوئے کہا کہ بائنانس اور ایچ ٹی ایکس کو نو آبجیکشن سرٹیفکیٹس کا اجرا ایک نئے ریگولیٹری وژن کی جانب عملی قدم ہے۔ انہوں نے کہا کہ نیا متعارف کرایا گیا فریم ورک انسداد منی لانڈرنگ اقدامات اور انسداد دہشت گردی کی مالی معاونت کی مؤثر نگرانی کے قابل بنائے گا۔

پاکستان کے بڑھتے ہوئے ڈیجیٹل اثاثوں کو اپنانے پر روشنی ڈالتے ہوئے، انہوں نے کہا کہ ملک کا شمار دنیا کے تین اعلی ترین کرپٹو اپنانے والے ممالک میں ہوتا ہے\

 ایک اندازے کے مطابق تین کروڑ سے چار کروڑ پاکستانی ڈیجیٹل اثاثے استعمال کر رہے ہیں۔ انہوں نے کہاکہ سو ٹریلین ڈالر کی عالمی بانڈ مارکیٹ تیزی سے ڈیجیٹل سسٹم کی طرف بڑھ رہی ہے جو کرپٹو اثاثوں کو ریگولیٹ کرنے کی اہمیت کو واضح کرتی ہے۔

انہوں نے کہا کہ مالیاتی نظام میں بروقت اور باخبر فیصلہ سازی ضروری ہے اور پاکستان ڈیجیٹل اثاثوں کے ضابطے میں عالمی ماڈل بننا چاہتا ہے۔انہوں نے کہاکہ آئندہ عشرے میں ٹیکنالوجی کے ذریعے ملک کی خودمختاری مزید مضبوط ہوگی۔