قومی ادارہ صحت نے نیپاہ وائرس کی ٹیسٹنگ کٹس حاصل کرلیں

اسلام آباد: قومی ادارہ صحت نے نیپاہ وائرس کی 100 ٹیسٹنگ کٹس حاصل کرلیں۔
تفصیلات کے مطابق نیپاہ وائرس سے متعلق سیکرٹری صحت حامد یعقوب کی زیر صدارت اجلاس  ہوا جس میں بتایا گیا کہ قومی ادارہ صحت نے نیپاہ وائرس کی 100 ٹیسٹنگ کٹس حاصل کرلی ہیں،جبکہ مشتبہ نیپاہ مریضوں کے نمونے تصدیق کیلئے قومی ادارہ صحت بھجوائے جائیں گے۔

 علاوہ ازاں حکام کا کہنا ہے کہ محکمہ صحت سندھ نے بھی نیپاہ وائرس الرٹ جاری کردیا ہے، پاکستان کے تمام زمینی و فضائی داخلی راستوں پر مسافروں کی 100فیصد اسکریننگ نافذ ہے۔

حکام کی جانب سے مزید بتایا کہ مسافروں کی گزشتہ 21 دن کی ٹریول ہسٹری چیک اورہائی رسک مسافروں کی نگرانی جاری ہے جب کہ اسکریننگ کے دوران بخار، سانس اور اعصابی علامات پر کڑی نظر رکھنے کی ہدایت کی گئی ہے، مشتبہ فرد کو فوری آئسولیٹ کر کے آئسولیشن یونٹ منتقل کیا جائے گا۔

حکام کے مطابق صوبوں کو نیپاہ کیلئے مخصوص اسپتال اور تربیت یافتہ عملہ یقینی بنانے کی ہدایات بھی جاری کی گئی ہے۔

دوسری جانب قومی ادارہ برائے صحت کا کہنا ہے کہ ابھی تک پاکستان میں نِیپاہ وائرس کا کوئی مصدقہ کیس نہیں ہے۔