پاکستان اورخلیج تعاون کونسل کے درمیان آزاد تجارتی معاہدہ جلد طے پا جائے گا،وزیراعظم

منامہ:وزیراعظم محمد شہباز شریف نے کہا ہے کہ پاکستان اور خلیج تعاون کونسل (جی سی سی) کے درمیان آزاد تجارتی معاہدے پر جلد دستخط کئے جائیں گے جس سے پاکستان اور جی سی سی کے رکن ملکوں بالخصوص بحرین کے ساتھ تجارت بڑھانے میں مدد ملے گی۔

تفصیلات کے مطابق بحرین کے دارالحکومت منامہ میں تاجر برادری سے خطاب کرتے ہوئےوزیر اعظم شہباز شریف نے کہا کہ ان کی حکومت مشترکہ منصوبوں میں تعاون، سرمایہ کاری کے منصوبوں میں سہولت اور ترقی کے باہمی فائدہ مند سفر میں اشتراک عمل کے لئے تیار ہے۔

اپنے خطاب میں انہوں نے بحرین کی قیادت اور تاجروں سے کہا کہ وہ آگے آئیں اور مل کر کام کریں اور پاکستانی معیشت بالخصوص صنعت، زراعت، آئی ٹی اور فن ٹیک کے شعبوں کو مزید متحرک بنائیں۔

شہباز شریف نے کہا کہ پاکستان اور بحرین دو برادر ملک ہیں اور ہمارے دہائیوں پرانے تعلقات ثقافت، مذہب، باہمی احترام اور اعتماد پر مبنی ہیں،ان کا کہنا تھا کہ ہمارے درمیان کئی دہائیوں پرانا سٹرٹیجک تعاون بھی ہے اور اب ہمیں ان تعلقات کو مزید متحرک اقتصادی تعاون میں بدلنا ہے۔

شہباز شریف نے کہا کہ پاکستان کے پاس نوجوانوں کی بڑی طاقت ہے، ہماری 60 فیصد آبادی 15 سے 30 سال کے درمیان ہے، نوجوانوں کو آئی ٹی اور اے آئی کی تربیت سے آراستہ کرنا چاہتے ہیں۔

وزیراعظم کا کہنا تھا کہ بحرین کے پاس عالمی مہارت اور معاشی تجربہ ہے، پاکستان بحرین کے ترقی کے سفر سے سیکھنا چاہتا ہے اور تعاون کا خواہاں ہے، بحرین کے سرمایہ کاروں کو پاکستان آنے کی دعوت دیتا ہوں۔

انہوں نے مزید کہا کہ پاکستان جی سی سی فری ٹریڈ ایگریمنٹ جلد حتمی مراحل میں داخل ہو جائے گا اور سرمایہ کاروں کو ہر ممکن سہولت فراہم کی جائے گی۔

وزیراعظم نے کہا کہ پاکستان برادر ملک بحرین کے ساتھ زراعت، آئی ٹی، مصنوعی ذہانت اور فن ٹیک سمیت باہمی دلچسپی کے تمام شعبوں میں اقتصادی تعاون بڑھانے کے لیے تیار ہے۔

خطاب کے اختتام پر وزیراعظم شہباز شریف نے معروف قول کا حوالہ دیتے ہوئے کہا کہ اگر تیزی سے جانا ہے تو اکیلے جائیں، دور جانا ہے تو مل کر چلیں، یہ پاکستان اور بحرین کے مستقبل کے باہمی تعاون اور مشترکہ ترقی کا بہترین فلسفہ ہے۔

اس موقع پر وزیراعظم شہباز شریف نے پرتپاک استقبال پر بحرین کے عوام اور قیادت سے اظہار تشکر کیا۔