ایکس کا نیا فیچر: لنک پر کلک کے بعد بھی پوسٹ سامنے رہے گی

اگر آپ ایکس (سابقہ ٹوئٹر) استعمال کرتے ہیں تو آپ نے محسوس کیا ہوگا کہ ویب لنکس پر مشتمل پوسٹس اتنی نمایاں نہیں ہوتیں جتنی دیگر پوسٹس۔ تاہم، ایکس کی جانب سے اب اس مسئلے کو حل کرنے کے لیے ایک نئے فیچر کی آزمائش شروع کر دی گئی ہے۔

ایکس کے پراڈکٹ ہیڈ نکیتا بیئر (Nikita Bier) نے ایکس پر ایک پوسٹ کے ذریعے بتایا کہ کمپنی ایک نئے تجرباتی فیچر پر کام کر رہی ہے، جس کا مقصد ویب لنک والی پوسٹس کو بہتر بنانا ہے۔

اس نئے فیچر کے تحت، صارفین کسی بھی ویب لنک پر کلک کرنے کے بعد اصل پوسٹ کو مکمل طور پر چھوڑنے کے بجائے، اسی پیج پر لنک کا مواد دیکھ سکیں گے۔ یوں لائیک، ری پوسٹ اور ریپلائی جیسے بٹنز بھی نظر آتے رہیں گے۔

فی الحال اس فیچر کی آزمائش ایکس کی iOS ایپ کے مخصوص صارفین کے ساتھ کی جا رہی ہے۔

نکیتا بیئر کے مطابق، موجودہ سسٹم میں جب صارف لنک پر کلک کرتا ہے تو وہ پوسٹ کے تعامل (engagement) جیسے لائک یا ریپلائی سے کٹ جاتا ہے، جس سے ایکس کے الگورتھم کو اندازہ نہیں ہو پاتا کہ یہ مواد کتنا مؤثر یا مقبول ہے۔

نیا فیچر اس کمی کو پورا کرنے کے لیے متعارف کروایا جا رہا ہے تاکہ ویب لنک والی پوسٹس بھی بہتر رسائی حاصل کر سکیں۔