تائی پے کے میٹرو اسٹیشن پر حملہ، 9 افراد زخمی، 4 کی حالت تشویشناک

تائی پے: تائیوان کے دارالحکومت تائی پے کے ایک سب وے اسٹیشن پر دھواں چھوڑنے والے بم پھینکنے اور بعد ازاں مسافروں پر حملے کے نتیجے میں کم از کم 9 افراد زخمی ہو گئے۔

مقامی میڈیا رپورٹس کے مطابق، ملزم نے شہر کے مرکزی ریلوے اسٹیشن کے قریب واقع تائی پے مین سب وے اسٹیشن میں اسموک گرینیڈ پھینکے، جس سے مسافر اور پیدل چلنے والے خوفزدہ ہو کر بھاگنے لگے۔

تائیوان کے سرکاری خبر رساں ادارےکے مطابق  زخمی افراد میں سے جن میں چار کی حالت تشویشناک بتائی جا رہی ہے، جبکہ  حملے کے باعث اسٹیشن میں شدید خوف و ہراس پھیل گیا۔

رپورٹس کے مطابق تائیوان کے وزیرِاعظم چو جنگ تائی نے فیس بک پر جاری بیان میں واقعے کی تصدیق کی تاہم اس حوالے سے  مزید تفصیلات فراہم نہیں کیں۔

وزیر اعظم نے مزید کہا کہ حکام ملزم کے پس منظر کی تحقیقات کر رہے ہیں، اور ملک بھر میں ٹرین اور سب وے اسٹیشنوں پر سیکیورٹی بڑھانے کے لیے پولیس کو ہدایات جاری کر دی گئی ہیں۔