روس سے تیل خریداری پر تنقید غیرمنصفانہ ہے، بھارت کا امریکا کو دوٹوک جواب

نئی دہلی: بھارت کی وزارتِ خارجہ نے امریکا اور یورپی یونین کی جانب سے روس سے تیل درآمد کرنے پر ہونے والی تنقید کو سختی سے مسترد کرتے ہوئے اسے "غیرمنصفانہ اور غیر منطقی" قرار دیا ہے۔

وزارتِ خارجہ کی جانب سے جاری بیان میں کہا گیا ہے کہ بھارت نے روس سے تیل اس وقت درآمد کرنا شروع کیا جب یوکرین جنگ کے آغاز پر یورپی ممالک نے خود اپنی سپلائیز روس سے منتقل کر لی تھیں، اور اس وقت امریکا نے خود بھارت کو روسی تیل خریدنے کی ترغیب دی تھی تاکہ عالمی توانائی مارکیٹ میں استحکام پیدا ہو۔

"بھارت کا مقصد عوام کو سستی توانائی دینا ہے"
بھارت نے مؤقف اپنایا کہ اس کی روسی تیل درآمدات کا مقصد خالصتاً عوام کو سستی توانائی فراہم کرنا ہے، اور یہ عالمی توانائی کی قیمتوں کے تناظر میں ایک ناگزیر معاشی اقدام ہے۔

وزارت خارجہ نے مزید کہا کہ بھارت پر تنقید کرنے والے ممالک خود روس کے ساتھ وسیع تجارتی تعلقات رکھتے ہیں، جن میں نہ صرف توانائی بلکہ کھاد، کیمیکل، مشینری اور دیگر اشیاء شامل ہیں۔

بھارتی بیان کے مطابق یورپی یونین نے 2024 میں روس کے ساتھ 67.5 ارب یورو کی اشیاء کی تجارت کی۔

خدمات کے شعبے میں یہ تجارت 17.2 ارب یورو رہی ، یورپ نے 2024 میں روس سے 1 کروڑ 65 لاکھ ٹن قدرتی گیس درآمد کی، جو 2022 کی سطح سے بھی زیادہ ہے۔

امریکا آج بھی روس سے جوہری صنعت کے لیے یورینیم ہیگزا فلورائیڈ، پیلڈیم، کھاد اور کیمیکل درآمد کر رہا ہے۔