خیبر پختونخوا میں تعلیمی انقلاب، وزیر اعلی نے علم پیکٹ پروگرام کا اجرا کر دیا

پشاور: خیبر پختونخوا کے وزیر اعلی ، علی امین گنڈا پور نے تعلیمی میدان میں بڑا قدم اٹھاتے ہوئے علم پیکٹ پروگرام کا باقاعدہ آغاز کر دیا۔ 

تفصیلات کے مطابق پروگرام کے تحت سرکاری سکولوں میں زیر تعلیم بچوں کو مفت کتابیں ، اسٹیشنری اور اسکول بیگز فراہم کیے جائیں گے۔ 

تقریب سے خطاب کرتے ہوئے وزیراعلیٰ کا کہنا تھا کہ ان کی حکومت تعلیم کو اولین ترجیح دے رہی ہے اور بجٹ کا 21 فیصد حصہ ابتدائی و ثانوی تعلیم کے لیے مختص کیا گیا ہے۔

انہوں نے انکشاف کیا کہ گزشتہ سال 13 لاکھ ایسے بچوں کو اسکول داخل کروایا گیا جو تعلیم سے محروم تھے، جبکہ رواں سال مزید 10 لاکھ بچوں کو اسکول لانے کا ہدف مقرر کیا گیا ہے۔

وزیر ااعلی کے پی علی امین گنڈاپور کا کہنا تھا کہ ہماری حکومت کا مشن ہے کہ ہر بچے کو معیاری تعلیم دی جائے تاکہ وہ ملک کے مفید شہری بن سکیں۔

دوسری جانب ماہرین تعلیم نے حکومت کے اس اقدام کو سراہتے ہوئے کہا ہے کہ یہ پروگرام اسکول نہ جانے والے بچوں کی تعداد کم کرنے اور تعلیمی معیار بہتر بنانے میں اہم کردار ادا کرے گا۔