پاک بھارت کشیدگی:پاکستان کی امن کی خواہش کو ہرگز کمزوری نہ سمجھا جائے، عطا تارڈ

وفاقی وزیر اطلاعات و نشریات عطا اللہ تارڑ نے اسلام آباد میں انسٹیٹیوٹ آف ریجنل ا سٹڈیز کے زیر اہتمام جنوبی ایشیا میں قیام امن پر پالیسی ڈائیلاگ سے خطاب کیا جس میںانہوں نے پہلگام واقعہ پر پاک بھارت تعلقات کی کشیدگی سے متعلق بات کرتے ہوئے کہا کہ ہم ہر جارحیت کا بھرپور جواب دینے کی صلاحیت رکھتے ہیں لیکن ہماری امن کی خواہش کو کمزوری نہ سمجھا جائے۔

وفاقی وزیر اطلاعات و نشریات عطااللہ تارڑ نے کہا کہ جنوبی ایشیا میں طاقت کے توازن کو ایک نئےزاویے سے دیکھنے کی ضرورت ہے، پاکستان جنوبی ایشیا میں امن کے لئے ہر ممکن کوشش کر رہا ہے۔

ان کا کہنا تھاکہ بھارت میں ہندوتوا نظریہ امن کے لیے بڑا خطرہ ہے، بھارت نے جنوبی ایشیا میں امن پسندی کی جڑوں کو کھوکھلا کرنے کی بھرپور کوشش کی ہے، وہ پاکستان میں بھی دہشتگردوں کی پشت پناہی کررہا ہے، پہلگام واقعہ کا ہم پر بے بنیاد الزام عائد کیا گیا، ہم نے دنیا سے کہا کہ پہلگام واقعہ پر غیر جانبدارانہ تحقیقات کروائی جائیں اور ہم نے سفارتی سطح پر دنیا کے سامنے اپنا موقف پیش کیا۔

عطااللہ تارڑ نے کہاکہ پاکستان دہشت گردی کا سب سے زیادہ شکار ملک ہے، ہم نے دہشت گردی کے خلاف جنگ میں بے پناہ قربانیاں دی ہیں، ہم ہرطرح کی جارحیت کا بھرپور جواب دینا جانتےہیں، پاکستان کی امن کی خواہش کو ہماری کمزوری ہرگز نا سمجھاجائے۔

انہوں نے کہاکہ بھارت پانی کو بطور ہتھیا ر استعمال کررہا ہے، پانی ہماری بقا ہے، اس پر کوئی سمجھوتہ نہیں کر سکتے، بھارت کی طرف سے سندھ طاس معاہدے کی یکطرفہ معطلی نہیں کی جا سکتی۔

وزیراطلاعات نے مسئلہ کشمیر کے بارے میں بات کرتے ہوئے واضح انداز میں کہا کہ اس مسلے کے حل کے بغیر خطے میں پائیدار امن ناممکن ہے، معرکہ حق کے بعد مسئلہ کشمیر عالمی سطح پر دوبارہ زندہ ہوگیا ہے، یہ مسئلہ سلامتی کونسل کی قراردادوں کے مطابق حل ہونا چاہیے۔
ان کا مزیدکہنا تھا کہ امریکی صدر ٹرمپ نے مسئلہ کشمیر کے حل کی بات کی ہے، اب عالمی سطح پر بھارت کی رسوائی ہو رہی ہے اور پاکستان کے قیام امن کے کردار کو سراہا جا رہا ہے۔