امریکا اور بھارت کا مشترکہ خلائی مشن: نِسار سیٹلائٹ خلا میں بھیج دیا گیا

نئی دہلی: بھارت اور امریکا نے مشترکہ طور پر تیار کردہ زمین کی نگرانی کا سیٹلائٹ ’نِسار‘ (NISAR) خلا میں کامیابی سے لانچ کر دیا ہے، جو خشکی، سمندر اور برفانی علاقوں میں ہونے والی معمولی تبدیلیوں کا بھی مشاہدہ کرنے کی صلاحیت رکھتا ہے۔

برطانوی نشریاتی ادارے کے مطابق یہ سیٹلائٹ بدھ کے روز شام 5:40 بجے (بھارتی وقت کے مطابق) جنوبی بھارت میں واقع ستیش دھون اسپیس سینٹر سے خلا میں روانہ کیا گیا۔

نِسار مشن ناسا (NASA) اور بھارتی خلائی تحقیقاتی ادارے اسرو (ISRO) کے اشتراک سے مکمل ہوا ہے۔ یہ دنیا کا پہلا سیٹلائٹ ہے جو بیک وقت دو مختلف ریڈار فریکوئنسیز — ناسا کا L-band اور اسرو کا S-band — استعمال کرے گا، جس سے اسے زمین پر ہونے والی معمولی ترین تبدیلیوں کا بھی سراغ لگانے میں مدد ملے گی۔

سابق ناسا سائنس دان میلا مترا کے مطابق نِسار ہر 12 دن بعد ایک ہی مقام کا دوبارہ جائزہ لے گا اور سینٹی میٹر کی سطح تک تبدیلی کو بھی شناخت کر سکے گا۔

ناسا کا کہنا ہے کہ نِسار اب تک کا سب سے جدید Synthetic Aperture Radar سیٹلائٹ ہے، اور اسے مکمل طور پر فعال ہونے میں تقریباً 90 دن لگیں گے۔ اس دوران اس کے تمام نظاموں کی جانچ اور ترتیب کا عمل مکمل کیا جائے گا۔

اس مشن پر ڈیڑھ ارب ڈالر (تقریباً) لاگت آئی ہے، جس میں بھارت نے سیٹلائٹ کے کچھ حصے، راکٹ، اور لانچنگ سہولیات فراہم کی ہیں، جب کہ باقی سائنسی اور تکنیکی نظام امریکا نے تیار کیے۔