عمران خان کے بیٹے امریکا دورے کے بعد لندن واپسی ،رہائی کے لیے کانگریسی رہنماؤں سے ملاقاتیں

لندن: پاکستان تحریک انصاف کے بانی عمران خان کے بیٹے قاسم خان اور سلیمان خان امریکا کا دورہ مکمل کرنے کے بعد لندن واپس پہنچ گئے ہیں۔

ذرائع کے مطابق دونوں بھائی اپنے والد عمران خان کی رہائی کے لیے امریکی کانگریس میں آواز اٹھانے کی غرض سے امریکا گئے تھے، جہاں انہوں نے متعدد کانگریسی رہنماؤں سے ملاقاتیں کیں۔

ملاقات کرنے والے کانگریس اراکین میں بریڈ شرمین، مائیک لیون (کیلیفورنیا)، ہاؤس فارن افیئرز کمیٹی کے رینکنگ ممبر گریگوری میکس، جم کوسٹا، ٹیڈ لیو، بلی سن، اور ہوریسن شامل تھے۔

عمران خان کے بیٹوں نے سابق امریکی صدر ڈونلڈ ٹرمپ کے قریبی ساتھی رچرڈ گرینل سے بھی ملاقات کی، تاہم ٹرمپ انتظامیہ کے کسی موجودہ نمائندے سے ان کی ملاقات نہ ہو سکی۔

دورے کے دوران کسی بھی معروف امریکی میڈیا پلیٹ فارم پر ان کا کوئی انٹرویو بھی نشر نہ ہو سکا۔

یاد رہے کہ گزشتہ روز اڈیالہ جیل میں صحافیوں سے غیر رسمی گفتگو کے دوران عمران خان نے واضح کیا تھا کہ ان کے بیٹے قاسم اور سلیمان پاکستان نہیں آئیں گے اور نہ ہی کسی احتجاجی تحریک کا حصہ بنیں گے۔

ذرائع کا کہنا ہے کہ عمران خان کی سابق اہلیہ جمائمہ گولڈ اسمتھ نے بھی ممکنہ سیکیورٹی خدشات کے پیشِ نظر اپنے بیٹوں کو پاکستان جانے سے منع کر رکھا ہے۔