ٹرمپ کا بڑا فیصلہ،امریکی جنگی طیارے گرین لینڈ پہنچنا شروع 

واشنگٹن ڈی سی: امریکا کے جنگی طیارے گرین لینڈ پہنچنا شروع ہوگئے۔

تفصیلات کے مطابق امریکی اور کینیڈین دفاعی ادارے نارتھ امریکن ایرو اسپیس ڈیفینس کمانڈ (نوراڈ) نے سوشل میڈیا پر بیان جاری کرتے ہوئے کہا کہ امریکی جنگی طیارے جلد گرین لینڈ میں قائم امریکی فوجی اڈے پر پہنچیں گے۔ 

امریکی اور کینیڈین دفاعی ادارے نوارڈ کے مطابق گرین لینڈ کی حکومت کو بھی منصوبہ بندی سے آگاہ کر دیا گیا ہے۔ نوارڈ کے مطابق امریکی طیاروں کی نئی کھیپ پہنچانے میں ڈنمارک حکومت سے ہم آہنگی ہے۔ امریکی فورسز کو ضروری سفارتی اجازت نامے حاصل ہیں۔

نوراڈ کے مطابق اس عمل میں ڈنمارک کی حکومت کے ساتھ مکمل ہم آہنگی موجود ہے اور امریکی فورسز کو تمام ضروری سفارتی اجازت نامے حاصل ہیں، تعیناتی دفاعی منصوبہ بندی کا حصہ ہے اور اس کا مقصد خطے میں فضائی نگرانی اور دفاعی صلاحیت کو مضبوط بنانا ہے۔

واضح رہے کہ گرین لینڈ ڈنمارک کا خود مختار علاقہ ہے، اور 1951 میں امریکا اور ڈنمارک کے درمیان گرین لینڈ دفاعی معاہدہ طے پایا تھا، جس کے تحت امریکا نے گرین لینڈ کو ممکنہ جارحیت سے بچانے کا عہد کیا تھا۔

اس کے علاوہ امریکا اور کینیڈا نے 1958 میں سرد جنگ کے دوران دفاعی معاہدہ نوراڈ پر دستخط کیے تھے، جس کا بنیادی مقصد بیلسٹک میزائلوں کی لانچنگ کی بروقت اطلاع فراہم کرنا ہے۔