وزیرِاعظم نے گلگت بلتستان کی نگراں کابینہ کی منظوری دے دی

ویب ڈیسک:گلگت بلتستان کی نگران حکومت نے کابینہ تشکیل دے دی۔

تفصیلات کے مطابق وزیراعظم پاکستان نے بحیثیت چیئرمین گلگت بلتستان کونسل، نگران وزیراعلیٰ گلگت بلتستان کی سفارش پر 14 رکنی نگران کابینہ کی تشکیل کی باضابطہ منظوری دے دی ہے، جس کا نوٹیفکیشن بھی جاری کر دیا گیا ہے۔

نوٹیفکیشن کےمطابق گلگت بلتستان اسمبلی کی نگران کابینہ میں ایک مہینے کے بعد 12 وزیروں سمیت دو مشیر شامل کرکے تشکیل کا عمل مکمل کرلیا گیا۔

نوٹیفکیشن میں یہ بات بھی سامنے آئی ہے کہ نگران کابینہ میں گلگت بلتستان کے دس اضلاع کو نمائندگی دی گئی ہے، نئے نامزد وزرا چوبیس گھنٹوں میں حلف اٹھائیں گے۔

نگران کابینہ میں شامل وزراء میں سجاد علی بیگ، انجینئر الطاف حسین، غلام عباس، کرنل (ر) ابرار اسماعیل، مہر داد، شرافت دین، مولانا سرور شاہ، راجہ شہباز خان، ممتاز حسین، ڈاکٹر نیازعلی، سید عدیل شاہ اور بہادر علی شامل ہیں، جبکہ سید فاطمہ اور عبدالحکیم کو مشیر مقرر کیا گیا ہے۔