ملتان: نشتر ہسپتال میں مبینہ غفلت کے باعث مریضہ جاں بحق،لواحقین کاشدید احتجاج

ملتان کے نشتر میڈیکل کالج ہسپتال میں ڈاکٹرز کی مبینہ غفلت کے باعث مریضہ جاں بحق ہوگئیں۔

تفصیلات کے مطابق نشتر ہسپتال ملتان میں معدے کے مرض میں مبتلا مریضہ کو لایا گیا تھا، ابتدائی معلومات کے مطابق علاج کے دوران مریضہ کے لیے خون کے انتظام میں وقت لگا، جسے انتظامیہ نے ایس او پیز کے تحت ضروری قرار دیا۔

 اسی دوران شفٹ کی تبدیلی کا وقت بھی قریب تھا، جس سے صورتحال مزید پیچیدہ ہو گئی۔ مریضہ کے انتقال کے بعد غمزدہ لواحقین نے احتجاج کیا، جس دوران ایک ڈاکٹر کی جانب سے نامناسب اشارے کی ویڈیو/تصویر سامنے آئی، جس پر سخت ردعمل دیکھنے میں آیا۔

مریضہ کے لواحقین نے ڈاکٹرز پر غفلت برتنے کا الزام لگایا ہے، مریضہ کے بیٹے نے دعویٰ کیا کہ ڈاکٹر نےخون کا انتظام کرنےکاکہا لیکن والدہ کو بروقت خون نہیں لگایا، جس کے باعث والدہ انتقال کرگئیں۔

متاثرہ اہلِ خانہ نے اعلیٰ حکام سے مطالبہ کیا ہے کہ واقعے کی شفاف تحقیقات کی جائیں اور غفلت کے مرتکب افراد کے خلاف مثال قائم کی جائے، تاکہ آئندہ کسی اور خاندان کو اس قسم کے سانحے کا سامنا نہ کرنا پڑے۔

دوسری جانب ہسپتال انتظامیہ نے ویڈیو بنانے پرنامناسب اشارہ کرنے والے ہاؤس آفیسر ڈاکٹر کو معطل کر دیا اور متاثرہ فیملی کو یقین دہائی کرائی کہ اگر ڈاکٹرز غفلت کے مرتکب پائے گئے تو ان کے خلاف سخت کارروائی عمل میں لائی جائے گی۔ 

انتظامیہ کا کہنا ہے کہ انکوائری مکمل ہونے کے بعد حقائق عوام کے سامنے لائے جائیں گے۔