لاہور میں مختلف علاقوں میں موسلادھار بارش،گرمی کی شدت میں کمی اور موسم خوشگوار ہو گیا

لاہور: صوبائی دارالحکومت لاہور میں مختلف مقامات پر موسلادھار بارش ریکا ڈ کی گئی جس سے گرمی کا زور ٹوٹ گیا اور موسم خوشگوار ہو گیا۔

تفصیلات کے مطابق لاہور کے مختلف علاقوں جن میں ماڈل ٹاون ، جوہر ٹاون اور کوٹ لکھپت،شاد مان سمیت شہر کے متعدد مقامات پر بادل خوب جم کر برسے ،جس سےکئی مقامات پر پانی جمع ہو گیا جس سے شہریوں کو مشکلات کا سامنا کرنا پڑ رہا ہے۔

موسلادھار بارش کے دوران نشیبی علاقے زیرآب آگئے۔ ذرائع کے مطابق دوپہر 1:35 سے دوپہر 2:35 تک پانی والا تالاب میں 65 ملی میٹر بارش ریکارڈ کی گئی، گلبرگ 5 ، لکشمی چوک میں 58 ملی میٹر بارش ریکارڈ کی گئی۔

اسی طرح نشتر ٹاؤن میں 8 ،چوک ناخدا 39، پانی والا تالاب 65 اور فرخ آباد میں 26 ملی میٹر بارش ریکارڈ کی گئی، گلشن راوی میں 10 ، اقبال ٹاؤن 12 ،سمن آباد 7 ،جوہر ٹاؤن 9 اور قرطبہ چوک میں 1 ملی میٹر بارش ریکارڈ ہوئی۔

شملہ پہاڑی، لکشمی چوک ،مال روڈ، جیل روڈ پر موسلادھار بارش برسی، لکشمی چوک ،ڈیوس روڈ، ایمپریس روڈ، حاجی کیمپ پر بارشی پانی جمع ہوگیا۔

دوسری جانب شہر کے مختلف علاقوں میں موسلا دھار بارش کے باعث بجلی کا ترسیلی نظام بری طرح متاثر ہو گیا، بارش سے لیسکو کے 120 سے زائد فیڈرز ٹرپ کر گئے، فیڈرز ٹرپ ہونے اور دیگر تکنیکی خرابیوں کے باعث متعدد علاقوں میں بجلی بند ہوگئی۔

گلشن راوی، سمن آباد، قلعہ گجر سنگھ، شاہدرہ ،امامیہ کالونی، شالیمار ،باغبانپورہ ،ہربنس پورہ، گڑھی شاہو ،مغل پورہ ،بھاٹی گیٹ سمیت اندرون شہر کے مختلف علاقوں میں بجلی بند رہی

بارش کے بعد انتظامیہ سڑکوں اور گلیوں سے پانی نکالنے میں مصروف ہے۔

 شہریوں کے لیے بارش خوشگوار ثابت ہوئی اور شہریوں نے اپنی فیملی و بچوں کے ہمراہ مختلف پارکس اور دیگر تفریحی مقامات کا رخ کرلیا،بارش کے باعث درجہ حرارت میں خاصی کمی ریکارڈ کی گئی جس سے شہر کا موسم خوشگوار ہو گیا۔