پی ٹی آئی نے 5 اگست کے احتجاجی منصوبے کو حتمی شکل دے دی

پاکستان تحریک انصاف (پی ٹی آئی) کی اعلیٰ قیادت نے 5 اگست کو ملک گیر احتجاجی پروگرام کو حتمی شکل دے دی ہے۔

ذرائع کے مطابق، پارٹی نے تمام ارکان قومی اسمبلی اور سینیٹرز کو اسلام آباد طلب کر لیا ہے، جہاں وہ اڈیالہ جیل کے باہر احتجاج میں شرکت کریں گے۔ اس دوران، ارکان صوبائی اسمبلی اپنے اپنے حلقوں میں احتجاج ریکارڈ کرائیں گے۔

ذرائع کا کہنا ہے کہ مرکزی قیادت نے تمام صوبائی صدور اور چیف آرگنائزرز سے مشاورت مکمل کر لی ہے۔ احتجاج "تحریکِ تحفظِ آئینِ پاکستان" کے پلیٹ فارم سے کیا جائے گا، جس کی نگرانی پی ٹی آئی کے سیکریٹری جنرل سلمان اکرم راجہ کریں گے۔

اطلاعات کے مطابق چاروں صوبوں کے ذمہ داران نے اپنے اپنے علاقوں کا احتجاجی شیڈول پارٹی قیادت کو ارسال کر دیا ہے۔ تمام ٹکٹ ہولڈرز کو الرٹ کر دیا گیا ہے جبکہ صوبائی صدور اور کوآرڈی نیٹرز قیادت کے ساتھ مسلسل رابطے میں رہیں گے۔