26 نومبر احتجاج کیس:  علیمہ خان کی ضمانت بحال، وارنٹ گرفتاری منسوخ

راولپنڈی: انسداد دہشت گردی عدالت (اے ٹی سی) نے 26 نومبر احتجاج کیس میںپاکستان تحریک انصاف(پی ٹی آئی) کے بانی چئیرمین عمران خان کی ہمشیرہ علیمہ خان کی درخواست ضمانت منظور کرتے ہوئے ان کے وارنٹ گرفتاری منسوخ کر دیے جبکہ عدالت نے فرد جرم کی کارروائی کو چیلنج کرنے کی درخواست بھی خارج کر دی۔

تفصیلات کے مطابق اے ٹی سی راولپنڈی میں 26 نومبر کے احتجاج پر مقدمے کی سماعت ہوئی ، کیس کی سماعت اے ٹی سی جج امجد علی شاہ نے کی۔

دوران سماعت علیمہ خان اپنے وکیل فیصل ملک کے ہمراہ پیش ہوئیں ،مقدمے کے 8 گواہان بھی عدالت کے احاطے میں موجود تھے۔
علیمہ خان کی جانب سے فرد جرم کی کارروائی کو چیلنج کرنے کی درخواست دائر کی گئی، جس میں وکیل نے کہا کہ قانون کے مطابق فرد جرم کے وقت ملزم کی موجودگی اور دستخط ضروری ہیں، اور ملزمہ و وکلاء کو فرد جرم کے بارے میں میڈیا کے ذریعے معلوم ہوا۔

جس پر پراسیکیوٹر نے کہا کہ فرد جرم قانونی طور پر درست طریقے سے عائد کی گئی، ملزمہ و وکلاء جان بوجھ کر تاخیری حربے استعمال کر رہے ہیں، اور دو ماہ تک کسی نے فرد جرم کی کاروائی چیلنج نہیں کی۔

عدالت نے دلائل سننے کے بعد علیمہ خان کی ضمانت بحال کی اور گزشتہ سماعت پر تاخیر سے پہنچنے پر جاری عدالتی احکامات واپس لے لیے،جبکہ مقدمے کا ٹرائل جاری ہے اور سرکاری گواہان کے بیانات ریکارڈ ہونا شروع ہو چکے ہیں۔

خیال رہے کہ اس سے قبل عدالت نے گزشتہ سماعت پر علیمہ خان کے ضمانتی مچلکے ضبط، توہین عدالت کا نوٹس جاری کیا تھا۔