ریاست مخالف سرگرمیوں کے الزام میں سینئر بنگلا دیشی صحافی گرفتار

ڈھاکا: ریاست مخالف سرگرمیوں کے الزام میں بنگلا دیشی سینئر صحافی انیس عالمگیر کو گرفتار کرلیا گیا۔

غیر ملکی خبر رساں ایجنسی کے مطابق بنگلادیشی پولیس نے پیر کو بتایا کہ انہوں نے سینیئر صحافی انیس عالمگیر کو مبینہ طور پر ریاست مخالف سرگرمیوں کے الزام میں گرفتار کیا ہے۔ 

میڈیا رپورٹس کے مطابق صحافی انیس عالمگیر پر سابق وزیراعظم شیخ حسینہ کی کالعدم جماعت کی تشہیر کا بھی الزام ہے،انیس عالمگیر کو انسدادِ دہشت گردی ایکٹ کے تحت 3 دیگر افراد کے ساتھ گرفتار کیا گیا۔ ان پر الزام ہے کہ انہوں نے ٹاک شوز اور سوشل میڈیا پوسٹس کے ذریعے پروپیگنڈا پھیلایا اور عوامی لیگ کی بحالی کی سازش کی۔

واضح رہے کہ بنگلادیشی عبوری حکومت نے مئی میں انسدادِ دہشت گردی ایکٹ میں ترامیم کے تحت شیخ حسینہ کی عوامی لیگ پر پابندی عائد کی تھی۔

بنگلادیش میں میڈیا کی آزادی طویل عرصے سے خطرات کا شکار رہی ہے اور شیخ حسینہ کے دورِ اقتدار کو جنوبی ایشیائی ملک میں میڈیا آزادی کے بدترین ادوار میں شمار کیا جاتا ہے۔

صحافت اور صحافیوں کے حقوق کے حوالے سے کام کرنے والے عالمی ادارےرپورٹرز ودآؤٹ بارڈرز  کے مطابق بنگلادیش 2025 میں پریس فریڈم کی عالمی درجہ بندی میں 180 ممالک میں 149ویں نمبر پر ہے۔