دیامر سیلاب: لاپتا افراد کی تلاش ختم، آپریشن اختتام پذیر ، غائبانہ نماز جنازہ ادا

گلگت بلتستان کے ضلع دیامر میں حالیہ سیلاب کے بعد لاپتا افراد کی تلاش کے لیے جاری سرچ آپریشن 14 روز بعد ختم کر دیا گیا ہے۔

جی بی حکومت کے ترجمان فیض اللہ فراق کے مطابق، سیلابی ریلے میں بہہ جانے والے افراد کے زندہ بچ جانے کی امیدیں ختم ہو چکی ہیں، جس کے باعث ریسکیو آپریشن بند کر دیا گیا ہے۔

انہوں نے بتایا کہ ملبے سے تمام گاڑیاں نکال لی گئی ہیں تاہم لاپتا افراد کا کوئی سراغ نہیں مل سکا، جس کے بعد ان کی غائبانہ نماز جنازہ ادا کی گئی ہے۔

ادھر وزیراعظم شہباز شریف آج گلگت بلتستان کے دورے پر پہنچے، جہاں انہوں نے وزیراعلیٰ گلبر خان سے ملاقات کی اور سیلاب سے متعلق ایک جائزہ اجلاس کی صدارت کی۔

وزیراعظم نے کہا کہ وہ سیلاب اور کلاؤڈ برسٹ سے ہونے والے نقصانات کا جائزہ لینے آئے ہیں۔ انہوں نے مزید کہا کہ ماحولیاتی تبدیلیوں کے چیلنجز سے نمٹنے کے لیے فوری اقدامات ناگزیر ہیں اور وزارت موسمیاتی تبدیلی کو اس حوالے سے ضروری ہدایات جاری کی گئی ہیں۔

واضح رہے کہ حالیہ مون سون بارشوں نے گلگت بلتستان کے کئی علاقوں میں شدید تباہی مچائی، جہاں ریلوں اور لینڈ سلائیڈنگ سے بھاری جانی و مالی نقصان ہوا۔ 21 جولائی کو ضلع دیامر میں شاہراہ بابوسر پر سیلابی ریلہ کئی سیاحوں کو بہا لے گیا تھا۔ اب تک 10 سے زائد افراد لاپتا ہیں جن کا تاحال سراغ نہیں لگایا جا سکا۔