وزیر اعلی علی امین گنڈا پور کا بڑا اعلان ،پولیس شہداء کے لواحقین کو پلاٹس دینے کا فیصلہ

پشاور:  وزیر اعلی خیبر پختونخوا علی امین گنڈا پور نے پولیس شہداء کی قربانیوں کو خراج تحسین پیش کرتے ہوئے شہداء کے لواحقین کے لیے اہم اعلانات کیے ہیں۔

تفصیلات کے مطابق پولیس شہداء کی تقریب سے خطاب کرتے ہوئے وزیر اعلیٰ نے کہا کہ خیبر پختونخوا کی پولیس نے دہشتگردوں کے خلاف بے مثال قربانیاں دی ہیںاور ان کے لواحقین کو کسی صورت تنہا نہیں چھوڑا جائے گا۔

تقریب سے خطاب میں وزیر اعلی علی امین گنڈا پور نے کہا کہ پولیس شہدا کے پیکج میں اضافہ کر دیا گیا ہے اور ان کے لواحقین کو پلاٹ فراہم کیے جائیں گے،ان کا کہنا تھا کہ ہمیں شہدا کے خاندانوں کا بھر پور خیال رکھناہے کیونکہ شہادت کا درجہ بہت بڑا ہے۔

 وزیر اعلیٰ نے کہا کہ پولیس کو جدید ٹیکنالوجی سے لیس کیا جا رہا ہے تاکہ وہ بہتر طریقے سے دہشتگردی سے نمٹ سکیں، ان کے مطابق ہماری پولیس جن دہشتگردوں کا مقابلہ کر رہی ہےوہ عام دہشتگرد نہیں ہیں۔

انہوں نے پولیس فورس کے مسائل کی نشاندہی پر بھی زور دیا اور کہا کہ ان مسائل کے حل کے لیے عملی اقدامات کیے جا رہے ہیں۔ 

وزیر اعلی نے مزید بتایا کہ گزشتہ سال پولیس کا بجٹ 124 ارب روپے تھاجسے رواں سال بڑھا کر 158 ارب روپے کر دیا گیا ہے تاکہ پولیس کو ہر ممکن سہولیات فراہم کی جا سکیں۔

وزیر اعلی کا کہنا تھا کہ صوبائی حکومت تمام شہدا کی فیملیز کے ساتھ کھڑی ہے اور پولیس فورس کی قربانیوں پر انہیں فخر ہے۔