شیخ حسینہ پر انسانیت سوز جرائم کا مقدمہ: زخمی مظاہرین کا پہلا گواہ عدالت میں پیش

بنگلہ دیش کی سابق وزیر اعظم شیخ حسینہ کے خلاف جاری مقدمے میں پہلے گواہ نے عدالت کے روبرو اپنا بیان ریکارڈ کروا دیا۔ یہ گواہ ان مظاہرین میں شامل تھا جنہیں گزشتہ سال حکومت مخالف احتجاج کے دوران فائرنگ کا نشانہ بنایا گیا تھا۔ ان ہی مظاہروں کے نتیجے میں شیخ حسینہ کی حکومت کا خاتمہ ہوا۔

عالمی خبر رساں ادارے اے ایف پی کے مطابق، 77 سالہ حسینہ واجد پر انسانیت کے خلاف جرائم جیسے سنگین الزامات عائد ہیں۔ انہوں نے بھارت میں قیام کے دوران عدالتی طلبی کے باوجود وطن واپس آ کر مقدمے کا سامنا کرنے سے انکار کر دیا ہے۔

شیخ حسینہ پر الزام ہے کہ انہوں نے طلبہ کی قیادت میں جاری احتجاجی تحریک کو طاقت کے زور پر کچلنے کے لیے خونریز کریک ڈاؤن کا حکم دیا تھا۔ اقوام متحدہ کے مطابق، جولائی سے اگست 2024 کے درمیان ان مظاہروں میں تقریباً 400 افراد جاں بحق ہوئے تھے۔

پہلے گواہ، کھوکن چندر برمن، ان 11 افراد میں شامل ہیں جنہیں استغاثہ عدالت میں پیش کرے گا۔ 23 سالہ برمن، جو اب ماسک سے چہرہ چھپاتے ہیں، 5 اگست 2024 کو مظاہرے کے اختتام پر گولی کا نشانہ بنے تھے—اسی دن جب شیخ حسینہ مبینہ طور پر ہیلی کاپٹر کے ذریعے ڈھاکہ سے فرار ہوئیں۔

عدالت میں اپنے بیان میں برمن نے کہا، "میں انصاف چاہتا ہوں—اپنی اذیتوں کے لیے، اور ان ساتھیوں کے لیے جنہوں نے جانیں قربان کیں۔"
وہ اپنی بائیں آنکھ کھو چکے ہیں، جبکہ چہرے کے دیگر حصے شدید زخمی ہوئے تھے۔

عدالت میں ان کی حالت کی عکاسی کرتی ایک خون آلود ویڈیو بھی دکھائی گئی، جبکہ مقدمے کے ابتدائی بیانات سرکاری ٹیلی وژن پر نشر کیے گئے۔

استغاثہ نے شیخ حسینہ پر پانچ سنگین الزامات عائد کیے ہیں، جن میں قتل عام روکنے میں ناکامی بھی شامل ہے۔ ان الزامات کو بنگلہ دیشی قانون کے تحت انسانیت کے خلاف جرائم قرار دیا گیا ہے۔

چیف پراسیکیوٹر تاج الاسلام نے اتوار کو عدالت میں کہا: "جولائی اور اگست 2024 کے دوران ہونے والے تمام جرائم کی ذمہ داری شیخ حسینہ پر عائد ہوتی ہے۔"

شیخ حسینہ کے ساتھ دو دیگر ملزمان بھی مقدمے کی کارروائی کا سامنا کر رہے ہیں۔ ان میں سابق وزیر داخلہ اسد الزمان خان کامل مفرور ہیں، جبکہ سابق انسپکٹر جنرل آف پولیس چوہدری عبداللہ المامون گرفتار ہو چکے ہیں اور وہ اپنا جرم تسلیم کر چکے ہیں۔

اٹارنی جنرل محمد اسد الزمان نے عدالت کے باہر میڈیا سے گفتگو میں کہا کہ حکومت ایک منصفانہ ٹرائل چاہتی ہے۔ ان کا کہنا تھا: "لوگ مارے گئے، معذور ہوئے۔ ہم ان جرائم پر سخت ترین سزا کا مطالبہ کرتے ہیں۔"

شیخ حسینہ کی طرف سے مقرر کردہ سرکاری وکیل عامر حسین نے عدالت کو بتایا کہ چندر برمن کو مظاہروں کے آخری اور پرتشدد دن کے دوران گولی لگی تھی۔ ان کا کہنا تھا کہ کئی پولیس اہلکار بھی مظاہرین سے جھڑپوں میں مارے گئے تھے، اور یہ واضح نہیں کہ برمن کو گولی کس نے ماری۔

انہوں نے مزید کہا کہ ان کا شیخ حسینہ سے کوئی براہِ راست رابطہ نہیں ہے، کیونکہ وہ عدالت کی عملداری کو تسلیم کرنے سے انکار کر چکی ہیں۔