اگرایران نےامریکی شرائط کو تسلیم نہ کیا تو فوجی کارروائی پہلے سے زیادہ شدید اور سخت ہو گی،ٹرمپ 

واشنگٹن ڈی سی : امریکی صدر ڈونلڈ ٹرمپ نے ایک دفعہ پھر دھمکی دیتے ہوئے کہا ہے کہ اگر ایران نے امریکی شرائط کو تسلیم نہ کی تو اس  صورت میں شدید حملے کیے جائیں گے۔ انہوں نے کہا کہ تعاون کی صورت میں آبنائے ہرمز سب کے لیے کھول دی جائے گی۔

تفصیلات کے مطابق اپنے سوشل میڈیا پلیٹ فارم ٹرتھ سوشل پر جاری بیان میں امریکی صدر ڈونلڈ ٹرمپ نے کہا ہے کہ اگر تہران طے شدہ شرائط کو قبول کر لیتا ہے تو جاری کشیدگی کا خاتمہ ممکن ہو جائے گا۔

جاری بیان کے مطابق ایسی صورت میں ایپک فیوری نامی کارروائی ختم کر دی جائے گی اور آبنائے ہرمز کو ایران سمیت تمام ممالک کے لیے کھول دیا جائے گا۔

بیان میں صدر ٹرمپ نےمزید کہا کہ ایران کی جانب سے شرائط ماننے کی صورت میں آبنائے ہرمز میں تمام ممالک کو بلا رکاوٹ رسائی دی جائے گی، جس سے خطے میں بحری آمدورفت معمول پر آ سکے گی۔ ان کا کہنا تھا کہ اس اقدام سے عالمی تجارت کو بھی استحکام حاصل ہوگا۔

تاہم انہوں نے دھمکی دی اور کہا کہ اگر ان شرائط کو تسلیم نہ کیا گیا تو امریکا کی جانب سے فوجی کارروائی دوبارہ شروع کی جائے گی، جو پہلے کے مقابلے میں کہیں زیادہ شدید اور وسیع پیمانے پر ہوگی۔ انہوں نے خبردار کیا کہ ایسی صورت میں حملوں کی شدت میں نمایاں اضافہ کیا جائے گا۔

جبکہ اس سے قبل امریکی صدر ڈونلڈ ٹرمپ نے پاکستان اور دیگر دوست ممالک کی اپیل پر آبنائے ہرمز میں جاری اپنے فوجی آپریشن پروجیکٹ فریڈم کو عارضی طور پر روکنے کا فیصلہ کیا ہے۔

خیال رہے کہ مریکہ اور ایران کے درمیان کشیدگی ایک طویل عرصے سے جاری ہے، جس میں علاقائی اثر و رسوخ اور سلامتی کے معاملات اہم کردار ادا کرتے ہیں۔ آبنائے ہرمز عالمی سطح پر تیل کی ترسیل کا ایک اہم راستہ ہے، جہاں کسی بھی قسم کی کشیدگی کے عالمی معیشت پر براہِ راست اثرات مرتب ہو سکتے ہیں۔