اسرائیلی حملے کا خطرہ برقرار ہے، کسی بھی جارحیت کا بھرپور جواب دیا جائےگا،ایرانی آرمی چیف

تہران : ایرانی مسلح فوج کے سربراہ جنرل امیر حاتمی نے کہا ہے کہ ایران پر اسرائیلی حملے کا خطرہ بدستور برقرار ہے لیکن ہمارے میزائل اور ڈرون بھی تیار ہیںاور کسی بھی جارحیت کا بھرپور جواب دیا جائے گا۔

برطانوی خبر رساں ایجنسی روئٹرز کے مطابق ایرانی مسلح فوج کے سربراہ جنرل حاتمی نے کہا ہے کہ ”اگر دشمن کا خطرہ صرف ایک فیصد بھی ہو، تو اسے سو فیصد سمجھا جانا چاہیے۔ ہمیں دشمن کو کمزور نہیں سمجھنا چاہیے اور ممکنہ خطرات کو نظر انداز نہیں کرنا چاہئے۔“

انہوں نے مزید کہا کہ ایرانی میزائل اور ڈرون طیارے اسرائیل کے خلاف جوابی کارروائیوں کے لیے پہلے کی طرح تیار ہیں۔

خیال رہے کہ ایران نے 12روزہ جنگ میں بھی اسرائیلی بمباری کے شروع ہونے کے بعد اسرائیل کے طول و عرض میں ڈرونز کے علاوہ بیلیسٹک میزائلوں سے سخت جواب دیا تھا جو اسرائیلی اور اس کے سب اتحادیوں کے لیے حیران کن رہا تھا۔

اس دوران اسرائیل کی بد ترین بمباری کے علاوہ امریکہ نے بھی ایرانی تنصیبات پر اپنے سب سے بڑے بم بنکر بسٹر گرا کر تین اہم ترین جوہری تنصیبات کو تباہ کر دینے کا اعلان کیا تھا ۔

بعدازاں ایران نے جوابی کارروائی کرتے ہوئے قطر میں موجود امریکی فوجی اڈے ’’ العدیدہ بیس‘‘ کو بیلسٹک میزائل سے نشانہ بنایا تھا جس کے بعد یہ سہ طرفہ لڑائی 24 جون کو جنگ بندی کے اعلان کے ساتھ ختم ہو گئی۔

پچھلے ماہ اسرائیلی وزیر دفاع کاٹز نے ایک بار پھر انتباہ کیا تھا کہ اگر ایران نے اسرائیل کے لیے کوئی خطرہ بننے کی کوشش کی تو پھر سے ایران پر حملہ کر دیا جائے گا۔