قصور: پاکستانی حدود کی خلاف ورزی پررینجر ز نے بھارتی شہری کو گرفتار کرلیا

قصور کے علاقے میں پاکستانی حدود کی خلاف ورزی پر ایک بھارتی شہری کو گرفتار کرلیا گیا ہے، جسے رینجرز نے حراست میں لینے کے بعد پولیس کے حوالے کر دیا۔

تفصیلات کے مطابق تھانہ گنڈا سنگھ کی حدود میں واقع سہجرہ کے مقام سے بھارتی شہری کو پاکستانی حدود میں داخل ہونے پر گرفتار کیا گیا۔

حکام کے مطابق گرفتار ہونے والے بھارتی شہری کی شناخت شرندیپ سنگھ ولد ستنام سنگھ کے نام سے ہوئی ہے۔

رینجرز حکا م کا کہنا ہے کہ گرفتار بھارتی شہری کا تعلق پوئی پور، تحصیل شاہکوٹ ضلع جالندھر سے بتایا جاتا ہے۔

بعد ازاں رینجرز نے گرفتار بھارتی شہری کو مزید قانونی کارروائی کے لیے تھانہ گنڈا سنگھ کی پولیس کے حوالے کر دیا۔ پولیس کی جانب سے واقعے کی تحقیقات جاری ہیں۔