پاکستان اورمالدیپ کا دوطرفہ تجارت کا حجم ایک کروڑ تیس لاکھ ڈالر سے بڑھا کر بیس کروڑ ڈالرتک لے جانے پراتفاق

اسلام آباد : پاکستان اور مالدیپ نے آئندہ دو سال میں دوطرفہ تجارت کا حجم ایک کروڑ تیس لاکھ ڈالر سے بڑھا کر بیس کروڑ ڈالرتک لے جانے پر اتفاق کیا ہے۔

یہ اتفاق رائے وزیراعظم شہباز شریف اور مالدیپ کے صدر ڈاکٹر محمد معیزو کے درمیان اسلام آباد میں ملاقات میں ہوا۔

بعد میں مشترکہ پریس کانفرنس سے خطاب کرتے ہوئے وزیراعظم شہباز شریف نے کہا کہ پاکستان اور مالدیپ کے درمیان دیرینہ تاریخی روابط پر مبنی مضبوط برادرانہ تعلقات ہیں۔

انہوں نے اعتماد ظاہر کیا کہ مالدیپ کے صدر کا دورہ ان تعلقات کو مزید وسیع اور مضبوط بناتے ہوئے نئی بلندیوں تک لے جائے گا۔

شہبازشریف نے کہا کہ دونوں فریقوں نے اقتصادی اور تجارتی تعلقات، سٹرٹیجک دفاعی تعاون اور مختلف شعبوں میں مالدیپ کے شہریوں کی تربیت کیلئے پاکستان کی معاونت سمیت باہمی دلچسپی کے تمام اہم امور پر تبادلہ خیال کیا۔

وزیراعظم نے کہا کہ آج دستخط کی گئی مفاہمتی یادداشتوں میں دوطرفہ تعلقات کے تمام اہم شعبوں کا احاطہ کیا گیا ہے۔ انہوں نے عزم ظاہر کیا کہ وہ مالدیپ کے صدر کے ساتھ مل کر بروقت فیصلوں اور تیز رفتار عملدرآمد کے ذریعے ان مفاہمتی یادداشتوں کو عملی شکل دیں گے۔