غزہ پر اسرائیلی جارحیت جاری، امداد کے منتظر 13 افراد سمیت 36 فلسطینی شہید

غزہ میں اسرائیلی فوج کے حملے تھم نہ سکے۔ قابض فورسز کی جانب سے پناہ گزین کیمپوں اور امداد کے منتظر فلسطینیوں کو نشانہ بنانے کا سلسلہ جاری ہے۔ فلسطینی حکام کے مطابق آج صبح سے اب تک مزید 36 افراد شہید ہو چکے ہیں، جن میں 13 شہری وہ تھے جو امدادی سامان کے انتظار میں کھڑے تھے۔

فلسطینی وزارتِ صحت نے تصدیق کی ہے کہ صرف گزشتہ 24 گھنٹوں کے دوران 98 فلسطینی شہید اور 1,000 سے زائد زخمی ہوئے۔

شہادتوں کی مجموعی تعداد 60 ہزار سے تجاوز کر گئی

وزارتِ صحت کے مطابق 7 اکتوبر 2023 سے جاری اسرائیلی حملوں کے نتیجے میں اب تک 60,430 فلسطینی شہید اور 1,48,722 زخمی ہو چکے ہیں۔ ان میں بڑی تعداد خواتین، بچوں اور معصوم شہریوں کی ہے۔

غذائی قلت کا بحران شدت اختیار کر گیا

عرب میڈیا کی رپورٹ کے مطابق غزہ میں شدید غذائی قلت کے باعث ایک بچے سمیت مزید 7 فلسطینی انتقال کر گئے، جس کے بعد بھوک سے جاں بحق ہونے والوں کی تعداد 169 ہو چکی ہے۔ امدادی تنظیموں نے خبردار کیا ہے کہ اگر فوری ریلیف نہ پہنچایا گیا تو ہلاکتوں میں نمایاں اضافہ ہو سکتا ہے۔

اسرائیل کا جنگ جاری رکھنے کا اعلان، حماس کا دوٹوک جواب

ادھر اسرائیلی حکومت نے اعلان کیا ہے کہ جب تک یرغمالیوں کو رہا نہیں کیا جاتا، جنگ بند نہیں کی جائے گی۔ اس کے جواب میں فلسطینی مزاحمتی تنظیم حماس نے ہتھیار ڈالنے سے انکار کرتے ہوئے کہا ہے کہ جب تک بیت المقدس کو دارالحکومت بنا کر ایک خودمختار فلسطینی ریاست قائم نہیں ہوتی، ہماری مزاحمت جاری رہے گی۔