کے الیکٹرک کے سی ای او مونس علوی کی برطرفی کا حکم معطل

کراچی: سندھ ہائیکورٹ نے صوبائی محتسب کی جانب سے کے الیکٹرک کے چیف ایگزیکٹو آفیسر (سی ای او) مونس علوی کو عہدے سے ہٹانے کا فیصلہ معطل کر دیا ہے۔

مونس علوی، اپنے وکیل بیرسٹر عابد زبیری کے ہمراہ عدالت میں پیش ہوئے۔ عدالت نے حکم دیا کہ وہ 25 لاکھ روپے جرمانے کی رقم ناظرِ سندھ ہائیکورٹ کے پاس جمع کرائیں۔

سماعت کے دوران عدالت نے صوبائی محتسب اور شکایت کنندہ کو نوٹس جاری کرتے ہوئے ریمارکس دیے کہ: "صوبائی محتسب کا قانون کہاں ہے؟” جس سے واضح ہوا کہ عدالت محتسب کے اختیارات اور دائرہ کار پر سوالات اٹھا رہی ہے۔

ترجمان کے الیکٹرک نے مونس علوی کے استعفے کی خبروں کو بے بنیاد قرار دیتے ہوئے واضح کیا کہ وہ تاحال اپنے عہدے پر قائم ہیں۔

یاد رہے کہ ایک روز قبل صوبائی محتسب نے مونس علوی کو ایک خاتون کو ہراساں کرنے کا مرتکب قرار دیتے ہوئے انہیں عہدے سے برطرف کرنے اور 25 لاکھ روپے جرمانہ عائد کرنے کا حکم دیا تھا۔ فیصلے میں مزید کہا گیا تھا کہ جرمانہ ادا نہ ہونے کی صورت میں ان کی منقولہ و غیر منقولہ جائیداد ضبط کی جائے گی۔

مونس علوی نے اس فیصلے کو سندھ ہائیکورٹ میں چیلنج کرتے ہوئے مؤقف اختیار کیا کہ انہوں نے اپنے تمام پیشہ ورانہ تعلقات میں دیانتداری، احترام اور وقار کو مقدم رکھا ہے۔ ان کے بقول، یہ فیصلہ ان کے لیے نہایت تکلیف دہ ہے۔