ضلعی انتظامیہ کا کھوکھر پیلس کیخلاف آپریشن ، سرکاری زمین واگزار

تفصیلات کے مطابق ضلعی انتظامیہ نے کھوکھر پیلس کیخلاف کامیاب آپریشن بغیر کسی مزاحمت کے تمام سرکاری زمین واگزار کروا لی۔ ضلعی انتظامیہ کے مطابق   38 کنال اراضی واگزار کروائی گئی ہے، 8 کنال اراضی جس پر مکانات تعمیر کئے گئے تھے انہیں بلڈوز کر دیاگیا جبکہ خالی زمین پر بنائے گئے سٹرکچز اور دیگر پلاٹس بھی واگزار کرالیے گئے۔

ملک سیف کھوکھر کا میڈیا سے گفتگو کرتے ہوئے کہنا تھا کہ    یہ کہتے ہیں قبضہ کیا ہے تو یہ قبضہ سپریم کورٹ نے کروایا ہے،  یہ سزا اس لئے دی گئی ہے کیونکہ ہم جمہوریت کے ساتھ کھڑے ہیں،  میں نے بھائیوں کی طرح پرامن ماحول کے لئے ان کو کھانا بھی کھلایا،  یہ ہمیں گھر بھی جانے نہیں دے رہے،  ہمارے قائد ہمیں پرامن رہنے کا کہتے ہیں ہم پر امن ہیں۔

ملک افضل کھوکھر نے کہا کہ  عمران خان نے آج زیادتی کی ہے، ہمیں سزا دی جاتی ہے ہم نواز شریف کے ساتھی ہیں، ادارے انتقامی سیاست کا حصہ بنے ہوئے ہیں،  اسمبلی کے اندر اور باہر رہ کر بات کریں گے۔

واضح رہے کہ   دسمبر 2020 میں بھی ضلعی انتظامیہ نے کھوکھر پیلس  میں شامل غیر قانونی اراضی واگزار کرانے کیلئے آپریشن کیا تھا  جس کو مسلم لیگ ن کے کارکنان کی جانب سے مزاحمت کے بعد ملتوی کردیا گیا تھا۔