لاہور میں مس پاکستان کے سالانہ مقابلے، فاتحین کے ناموں کا اعلان

اپنے رپورٹر سے

لاہور: لاہور کے ایک مقامی ہوٹل میں مس پاکستان کے سالانہ مقابلے کا انعقاد کیا گیا، جہاں خوب صورت ماڈلز نے ریمپ پر جلوے بکھیر کر تقریب کو چار چاند لگا دیے۔

مقابلے میں جیا خان نے مس یونیورس، ازقا سہیل نے مس پاکستان یونیورسل، کومل فاروق بٹ نے مس پاکستان سپریم جبکہ عاصمہ بتول نے مس پاکستان گلوبل کا ٹائٹل اپنے نام کیا۔ عبدالصمد کو مسٹر پاکستان ورلڈ کا اعزاز دیا گیا۔

تقریب کے دوران موسیقی کی پرفارمنسز نے محفل کی رونق بڑھا دی، جبکہ شوبز سے وابستہ شخصیات سمیت مختلف سیاسی و سماجی شخصیات نے بھی شرکت کی اور تقریب کے انعقاد کو سراہا۔

ٹائٹل جیتنے والی خواتین نے کہا کہ کامیابی سے ان کی ایک خواہش پوری ہوئی ہے اور اب وہ عالمی سطح پر پاکستان کا نام روشن کرنے کی خواہش مند ہیں۔

دیگر فاتحین نے کہا کہ پاکستان میں بے پناہ ٹیلنٹ موجود ہے، تاہم اسے اپنی صلاحیتوں کے اظہار کے لیے مناسب پلیٹ فارم فراہم کرنے کی ضرورت ہے۔

 تقریب کے اختتام پر کامیاب خواتین کو تاج پہنائے گئے جبکہ مرد فاتح کو ٹائٹل سے نوازا گیا۔