اپوزیشن کا اوپن بیلٹ آرڈیننس کا معاملہ پارلیمان میں اٹھانے کا فیصلہ

تفصیلات  کے مطابق اوپن بیلٹ سے متعلق آرڈیننس کے معاملہ میں اپوزیشن جماعتوں نے سینیٹ اجلاس کے لئے ریکوزیشن جمع کرانے کے لئے رابطے تیز کردیئے اور اسی سلسلہ میں پیپلزپارٹی نے مسلم لیگ ن سے اہم رابطہ کیا جس میں سینیٹ اجلاس کے لئے ریکوزیشن جمع کرانے پر مشاورت مکمل کر لی گئی  اور اپوزیشن نے ریکوزیشن تیار کرنے کا ٹاسک پیپلزپارٹی کو سونپ دیا۔

بعدازاں اپوزیشن جماعتوں نے سینیٹ اجلاس کے لئے ریکوزیشن جمع کرادی ہے اورریکوزیشن پر 28 اراکین سینٹ کے دستخط ہیں۔ریکوزیشن پر مسلم لیگ ن ، پیپلز پارٹی ، نیشنل پارٹی،پی کے میپ ،جے یو آئی ف اور بی این پی مینگل کے سینٹرز کے دستخط موجود ہیں اور ریکوزیشن میں اپوزیشن نے مؤقف اپنایا ہے کہ سینیٹ الیکشن سے متعلق صدارتی آرڈیننس پر بحث کی جائے ۔

واضح رہے کہ 6 فروری کو صدر مملکت ڈاکٹر عارف علوی نے سینیٹ کے انتخابات خفیہ رائے شماری کے بجائے اوپن بیلٹ کے ذریعے کروانے کے لیے آرڈیننس جاری کیا ۔ یہ آرڈیننس سپریم کورٹ میں دائر کردہ صدارتی ریفرنس پر عدالتی رائے سے مشروط کیا گیا ہے۔ آرڈیننس کے مطابق اوپن ووٹنگ کی صورت میں سیاسی جماعتوں کا سربراہ یا نمائندہ ووٹ دیکھنے کی درخواست کر سکے گا۔