ایف بی آرنے ہدف سے زیادہ ٹیکس کیسز نمٹا دیے

ترجمان فیڈرل بورڈ آف ریونیو(ایف بی آر) کے مطابق جولائی سے دسمبر کمشنرز ان لینڈ ریونیو اپیلز نے مقررہ ہدف سے ساڑھے نو ہزار سے زائد اپیلوں کو نمٹایا،رواں مالی سال کی پہلی ششماہی کے دوران 7818 ٹیکس کیسز نمٹانے کا ہدف رکھا گیا تھا۔

ترجمان نے مزید کہا کہ ایپیلیٹ ٹربیونلز اور عدالتوں میں زیر التوء کیسز کو جلد نمٹانے کے لئے اقدامات کیے گئے، ٹیکس مقدمات کی سماعت کیلئے سندھ، لاہور اور اسلام آباد ہائی کورٹس نے خصوصی بینچز تشکیل دیئے ہیں،دسمبر 2020 تک ہائی کورٹس اور سپریم کورٹ نے 81.7 ارب روپے کے 934 ٹیکس کیسز نمٹائے جبکہ ایپیلیٹ ٹربیونل ان لینڈ ریونیو نے اسی عرصہ میں 168.5 ارب روپے کے 1240 کیسز نمٹائے۔

ترجمان نے مزید کہا کہ ٹیکس گزاروں کی سہولت کے لئے اے ڈی آر سی (متبادل تنازعات کی کمیٹیاں) کا نظام تشکیل دیا گیا ہےجس کے تحت ٹیکس گزارنامزد کمیٹیوں کے ذریعے اپنے زیر التوء کیسز کو قلیل وقت میں حل کرواسکتے ہیں، ٹیکس گزاروں کی درخواست پر 18 کمیٹیوں نے کیسز کو نمٹانے کے لئے کام شروع کر دیا ہے اور فنانس ایکٹ 2020 کے تحت ٹیکس گزار اپیل کے فورم سے کیس واپس لئے بغیر اے ڈی آرسی کے ذریعے کیس حل کروانے کے لئے درخواست دے سکتا ہے،اے ڈی آر سی کے ممبران میں متعلقہ چیف کمشنر، معزز جج، چارٹرڈ اکاونٹینٹس اور کاروباری افراد بھی شامل ہیں۔

ایف بی آر نے مزید کہا کہ کمیٹی کو ہارڈشپ کیسز میں ریکوری کو روکنے کا اختیار بھی دیا گیا ہے،کمیٹی ٹیکس گزاروں کی سہولت کیلئے درخواستوں کو 120 دنوں میں نمٹانے کی ذمہ دار ہو گی۔