ایل او سی پر بلااشتعال فائرنگ،بھارتی سینئر سفارتکار کی دفتر خارجہ طلبی

ترجمان دفتر خارجہ کے مطابق پاکستان نے لائن آف کنٹرول(ایل او سی)پر سیز فائر کی خلاف ورزی پر بھارتی سینئر سفارتکار کو دفتر خارجہ طلب کر کے شدید احتجاج ریکارڈ کرایا جبکہ احتجاجی مراسلہ بھی تھمایا۔

ترجمان دفتر خارجہ نے مزید کہا کہ بھارتی افواج نے تتہ پانی سیکٹر پر 2 فروری کو بلااشتعال فائرنگ کی اور بھارتی افواج کی اشتعال انگیزی سے 4 شہری زخمی ہوئے،بھارت رواں برس 175 بار سیز فائر کی خلاف ورزیاں کر چکا ہے اور رواں برس بھارتی فائرنگ سے 8 افراد زخمی ہو چکے ہیں۔

ترجمان دفتر خارجہ نے مزید کہا کہ بھارت کا معصوم شہریوں کو جان بوجھ کر نشانہ بنانا قابل مذمت ہے، بھارتی فورسز مسلسل لائن آف کنٹرول، ورکنگ باونڈری پر شہری آبادی کو نشانہ بنا رہی ہیں،بھارت کی پے در پے اشتعال انگیزیاں خطے میں امن و سلامتی کے لیے خطرہ ہیں،بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا،بھارت اقوام متحدہ سلامتی کونسل کی قراردادوں پر عمل درآمد یقینی بنائے اور بھارت 2003ء کے جنگ بندی انتظام کی پاسداری کرے۔

ترجمان نے مزید کہا کہ ہندوستان کا نہتے شہریوں کو نشانہ بنانا عالمی قوانین، اقدار کے منافی ہے،اقوام متحدہ فوجی مبصر مشن کو ایل او سی پر کام کرنے دیا جائے۔