ہماری امن کی خواہش کو ہماری کمزوری نہ سمجھا جائے، آرمی چیف

ڈی جی آئی ایس پی آر کے مطابق  پی اے ایف اکیڈمی میں جی ڈی پائلٹ کی 144ویں پاسنگ آوٹ تقریب ہوئی، آرمی چیف جنرل قمر جاوید باجوہ تقریب کے مہمان خصوصی تھے، پاک فضائیہ کے سربراہ ایئر چیف مارشل مجاہد انور خان بھی تقریب میں موجود تھے۔ آرمی چیف نے پی اے ایف اکیڈمی اصغر خان میں تربیت کے لئے سعودی کیڈٹس کی موجودگی کو سراہا۔

آرمی چیف نے کہا کہ پاکستان ، سعودی عرب اور ہماری دفاعی فورسز کے درمیان یہ مضبوط تعلقات کا مظہر ہے، ہمیں اسلام ، بھائی چارے اور ثقافتی تعلقات کے مضبوط بندھن پر فخر ہے۔آرمی چیف جنرل قمر جاوید باجوہ نے تقریب سے خطاب کیا اور  آرمی چیف نے پاس آوٹ ہونے والے کیڈٹس کو مبارکباد دی۔

آرمی چیف جنرل قمر جاوید باجوہ نے خطاب میں کہا کہ پاکستان امن پسند ملک ہے،  پاکستان نے علاقائی اور عالمی امن کیلئے بہت قربانیاں دیں ہیں ،ہم باہمی احترام اور پرامن بقائے باہمی پر یقین رکھتے ہیں۔

جنرل قمر جاوید باجوہ نے کہا کہ  وقت آگیا ہے کہ ہرسمت امن کا ہاتھ بڑھایا جائے، پاکستان اور بھارت کو طویل مدت سے تصفیہ طلب جموں و کشمیر کا مسئلہ باوقار اور پرامن طریقہ سے جموں و کشمیر کے عوام کی خواہشات کے مطابق حل کرنا چاہئے۔ جموں و کشمیر کے انسانی المیہ کو منطقی انجام تک پہنچایا جائے۔

آرمی چیف جنرل قمر جاوید باجوہ نے  اپنے خطاب میں کہا کہ ہم کسی کو اپنی امن کی خواہش کا غلط مطلب نہیں لینے دیں گے، ہماری امن کی خواہش کو ہماری کمزوری نہ سمجھا جائے۔