حکومت اپوزیشن مذاکرات: رانا ثنا اور راجا ناصرکے درمیان تلخ جملوں کا تبادلہ

اسلام آباد: وفاقی دارالحکومت اسلام آباد میں حکومت اور اپوزیشن کے درمیان مذاکرات اس وقت جاری ہیں۔ حکومت اور اپوزیشن رہنماؤں کے درمیان جاری مذاکرات میں ملک کی موجودہ سیاسی صورت حال اور باہمی معاملات پر بات چیت کی جا رہی ہے جب کہ اس دوران فریقین کے درمیان بعض معاملات پر گرما گرمی بھی دیکھنے میں آئی ہے۔

حکومت اور اپوزیشن کے درمیان جمعے کے روز ہونے والے مذاکرات کا دوسرا دور اسپیکر قومی اسمبلی ایاز صادق کے چیمبر کے کمیٹی روم میں جاری ہے۔

حکومت کی جانب سے مذاکراتی وفد کی قیادت اسپیکر قومی اسمبلی سردار ایاز صادق کر رہے ہیں جب کہ دیگر ارکان میں وزیر داخلہ محسن نقوی، وزیر مملکت داخلہ طلال چوہدری، وفاقی وزیر پارلیمانی امور ڈاکٹر طارق فضل چوہدری اور رانا ثناء اللہ بھی شریک ہیں۔

پیپلزپارٹی کی جانب سے سینیٹر شیری رحمان، نوید قمر اور اعجاز جاکھرانی اجلاس میں شریک ہیں۔

اپوزیشن کی مذاکراتی ٹیم میں سینیٹ میں اپوزیشن لیڈر علامہ راجا ناصر عباس، چیئرمین پی ٹی آئی بیرسٹر گوہر، سابق اسپیکر قومی اسمبلی اسد قیصر، عامر ڈوگر اور سلمان اکرم راجہ شامل ہیں۔

ذرائع کے مطابق ملاقات میں خیبر پختونخوا کی مجموعی صورتحال کا جائزہ لیا جائے گا، لانگ مارچ ملتوی کرنے پر بھی بات ہوگی۔

اسپیکر کے چیمبر میں حکومت اور اپوزیشن رہنماؤں کے مذاکرات میں ماحول کشیدہ ہوگیا، عدالتی معاملات پر رانا ثناءاللہ اور اپوزیشن لیڈر سینیٹ علامہ راجہ ناصر عباس میں تلخ جملوں کا تبادلہ ہوا۔

اس موقع پر اسپیکر قومی اسمبلی ایاز صادق نے مداخلت کی اور فریقین پر افہام و تفہیم کے ذریعے معاملات کو آگے بڑھانے پر زور دیا۔