قومی اسمبلی کی قائمہ کمیٹی نے سینیٹ الیکشن اوپن کرانے کا بل منظور کرلیا

تفصیلات کے مطابق  قائمہ کمیٹی برائے قانون و انصاف کا چئیرمین ریاض فتیانہ کی زیر صدارت اجلاس ہوا، جس میں سینیٹ الیکشن اوپن کرنے سے متعلق بل زیر بحث آیا،چھ ارکان نے سینیٹ الیکشن اوپن کرنے کی حمایت  کردی، جبکہ اپوزیشن کے تین ارکان کی سینیٹ الیکشن خفیہ رکھنے کی حمایت کی۔

سینیٹ الیکشن اوپن کرنے کی مخالفت کرنے والوں میں پاکستان پیپلزپارٹی  کے تین ارکان سید نوید قمر ، ڈاکٹر نفیسہ شاہ اور سید حسین طارق شامل ہیں۔اپوزیشن ارکان نے الزام لگایا کہ چیئرمین کمیٹی معاملے کو بلڈوز کرنے کی کوشش کررہے ہیں۔

قائمہ کمیٹی نے کثرت رائے سے سینیٹ الیکشن اوپن کرنے کا بل منظور کرلیا۔ بل کے حق میں 6 جبکہ مخالفت میں 3 ووٹ آئے،  اجلاسں میں ن لیگ کے اراکین شرکت نہ کر سکے۔

واضح رہے کہ وفاقی حکومت نے 23 دسمبر کو صدر مملکت کی منظوری کے بعد سینیٹ انتخابات اوپن بیلٹ کے ذریعے کرانے کے لیے سپریم کورٹ میں ریفرنس دائر کیا۔ صدر مملکت ڈاکٹر عارف علوی نے آئین کے آرٹیکل 186 کے تحت سپریم کورٹ میں ریفرنس بھجوانے کی وزیر اعظم کی تجویز کی منظوری دے دی اور ریفرنس پر دستخط کیے تھے۔عدالت عظمیٰ میں دائر ریفرنس میں صدر مملکت نے وزیر اعظم کی تجویز پر سینیٹ انتخابات اوپن بیلٹ کے ذریعے کرانے کی تجویز مانگی ہے۔

 ریفرنس میں مؤقف اپنایا گیا کہ آئینی ترمیم کے بغیر الیکشن ایکٹ میں ترمیم کرنے کے لیے رائے دی جائے۔وفاقی حکومت نے ریفرنس میں کہا ہے کہ خفیہ انتخاب سے الیکشن کی شفافیت متاثر ہوتی ہے اس لیے سینیٹ کے انتخابات اوپن بیلٹ کے ذریعے منعقد کرانے کا آئینی و قانونی راستہ نکالا جائے۔4جنوری 2021 کو  چیف جسٹس آف پاکستان  گلزار احمد کی سربراہی میں پانچ رکنی بنچ نے ریفرنس پر سماعت کرتے ہوئے  پانچوں ایڈووکیٹ جرنلز ، اسپیکر قومی و صوبائی اسمبلی،  چیئرمین سینیٹ اور الیکشن کمیشن آف پاکستان (ای سی پی) کو نوٹس جاری کیا تھا۔

2 1جنوری 2021 کو  جمیعت علمائے اسلام  (ف)  نے سینیٹ انتخابات کے معاملے میں عدالت عظمی کی رہنمائی کے لئے صدارتی ریفرنس کی سماعت کے دوران اوپن بیلٹ کے ذریعے انتخابات کروانے کی مخالفت کی۔ وفاقی حکومت نےاس پر  تحریری جواب پیش کیا جبکہ حکومت سندھ کو ریفرنس پر اپنا مؤقف پیش کرنے کیلئے ایک ہفتہ کی مہلت دی گئی ۔

16جنوری 2021 کو  الیکشن کمیشن آف پاکستان (ای سی پی) نے صدارتی ریفرنس کی سماعت کے دوران سینیٹ انتخابات کے انعقاد کی مخالفت کرتے ہوئے عدالت عظمی ٰ سے رہنمائی  طلب کرلی ۔الیکشن کمیشن پاکستان نے سینیٹ انتخابات اوپن بیلٹ سے کرانے سے متعلق صدارتی ریفرنس کی مخالفت کردی ، کمیشن نے سپریم کورٹ کو آگاہ کیا کہ سینیٹ انتخابات ہمیشہ آئین کی دفعہ 226 کے مطابق خفیہ رائے شماری کے ذریعے ہی ہوئے ہیں۔ لہذا اوپن بیلٹ کے ذریعے مذکورہ انتخابات کے انعقاد کے لئے آئین کے آرٹیکل 226 میں ترمیم کی ضرورت ہے۔

22 جنوری 2021  کو سندھ  ہائیکورٹ بار ایسوسی ایشن نے سپریم کورٹ کو بتایا کہ صدر مملکت ڈاکٹر عارف علوی نے  دائر کردہ ایک ریفرنس میں سپریم کورٹ کے مشاورتی دائرہ اختیار کو غلط اور وقت سے پہلے رجوع کیا جس میں عدالت عظمیٰ سے سینیٹ کے انتخابات اوپن بیلٹ اور شو آف ہینڈز کے ذریعے کرانے کے بارے میں رائے طلب کی گئی ہے۔

23 جنوری 2021 کو چئیرمین سینیٹ صادق سنجرانی نے صدارتی ریفرنس کا جواب پیش کرتے ہوئے اوپن بیلٹ کے ذریعے سینیٹ انتخابات کرانے کی حمایت کی  ۔

25 جنوری 2021کو سندھ حکومت نے سینیٹ انتخابات اوپن بیلٹ سے کرانے کی مخالفت کردی۔