آذربائیجانی خاتون زیادتی کیس، مرکزی ملزم گرفتار

لاہور: لاہور کے علاقے ڈیفنس میں آذربائیجان سے تعلق رکھنے والی 20 سالہ خاتون سے مبینہ اجتماعی زیادتی کے کیس میں اہم پیش رفت ہوئی ہے، پولیس نے مرکزی ملزم محسن کو گرفتار کرلیا جبکہ شاہدرہ پولیس نے مزید چھ افراد کو حراست میں لے کر ڈیفنس سی پولیس کے حوالے کردیا۔

پولیس کے مطابق حراست میں لیے گئے چھ افراد مرکزی ملزمان کے قریبی دوست ہیں اور مبینہ طور پر واقعے میں ملوث افراد سے رابطے میں رہے ہیں۔ پولیس ان سے مزید تفتیش کررہی ہے۔

متاثرہ خاتون کی میڈیکل رپورٹ کے مطابق اس کے کندھے اور گھٹنے پر زخموں کے نشانات پائے گئے۔ رپورٹ کے مطابق خاتون کے جسم سے ڈی این اے کے نمونے بھی حاصل کیے گئے، جبکہ مخصوص جسمانی حصوں پر موجود نشانات کو مبینہ زیادتی سے مطابقت رکھنے والا قرار دیا گیا ہے۔

پولیس کے مطابق خاتون، گرفتار اور زیرحراست افراد کے بیانات، میڈیکل رپورٹ، موبائل ڈیٹا اور دیگر شواہد کا جائزہ لیا جارہا ہے تاکہ واقعے کے تمام پہلوؤں کا تعین کیا جاسکے۔

ابتدائی تفتیش کے مطابق خاتون چند روز قبل لاہور پہنچی تھی۔ خاتون نے بیان دیا کہ 25 ستمبر کی رات دو نامعلوم لڑکیاں اسے ایک کیفے میں لے گئیں، جہاں تین دیگر افراد پہلے سے موجود تھے۔

خاتون نے الزام عائد کیا کہ کیفے میں اسے نشہ آور چیز پلائی گئی، جس کے بعد کئی افراد نے اسے مبینہ زیادتی کا نشانہ بنایا۔ اس کے مطابق واقعے کے بعد اسے ایئرپورٹ کے قریب چھوڑ دیا گیا جبکہ مبینہ ملزمان فرار ہوگئے۔

پولیس کے مطابق خاتون کی ٹریول ہسٹری اور بعض بیانات میں تضاد سامنے آیا ہے۔ لاہور میں اس کے متعدد افراد سے رابطوں کا ریکارڈ بھی ملا ہے، جس کی بنیاد پر مختلف پہلوؤں سے تحقیقات جاری ہیں۔