آصف اقبال کی یاد میں تعزیتی ریفرنس، فنی خدمات کو خراجِ تحسین

لاہور: معروف اداکار آصف اقبال کی یاد میں پنجاب آرٹس کونسل میں تعزیتی ریفرنس کا انعقاد کیا گیا، جس میں نامور فنکاروں، ہدایت کاروں اور دیگر شخصیات نے شرکت کی اور مرحوم کی فنی خدمات کو خراجِ تحسین پیش کیا۔

تعزیتی ریفرنس میں ایگزیکٹو ڈائریکٹر پنجاب آرٹس کونسل محبوب عالم چودھری، سینئر اداکار قیصر پیا، آفریں پری، شاہد خان، گوشی خان، خالد معین بٹ اور آصف اقبال کے صاحبزادوں سمیت دیگر افراد شریک ہوئے۔

اس موقع پر فنکاروں نے آصف اقبال کی فن کے لیے خدمات کو سراہتے ہوئے ان کی فنی زندگی اور کردار پر روشنی ڈالی۔

آصف اقبال کے صاحبزادوں نے کہا کہ ان کے والد نے ہمیشہ ان کی اچھی تربیت کی اور انہیں اس قابل بنایا کہ وہ آج بہتر زندگی گزار سکیں۔

ایگزیکٹو ڈائریکٹر محبوب عالم چودھری نے کہا کہ پنجاب آرٹس کونسل فنکاروں کی فلاح اور معاونت کے لیے ہر وقت اپنا کردار ادا کرتی رہے گی۔

تقریب کے اختتام پر آصف اقبال کی یاد میں ان کے صاحبزادوں اور شریک سینئر فنکاروں کو یادگاری شیلڈز پیش کی گئیں، جبکہ مرحوم کے لیے بلندیِ درجات کی دعا بھی کی گئی۔