وزیراعظم اور زرتاج گل نے بھی ووٹ ضائع کر دیا ہے : رانا ثنااللہ کا دعویٰ

جی این این کے مطابق مسلم لیگ ن پنجاب کے صدر رانا ثنا اللہ نے دعویٰ کیا ہے کہ وزیر اعظم عمران خان اور وفاقی وزیر زرتاج گل کا ووٹ بھی ضائع ہو چکا ہے۔ انہوں نے کہا کہ شہریار آفریدی نے تو بیلٹ پیپر پر دستخط کیے ہیں وزیراعظم اور زرتاج گل نے سیریل نمبر کے بجائے ٹک لگایا ہے  ۔ 

دوسری جانب وزیراعلیٰ پنجاب کی معاون خصوصی فردوس عاشق اعوان نے نجی ٹی وی سے گفتگو میں کہا ہے کہ وفاقی وزیر زرتاج گل نے بھی ووٹ کاسٹ کرنے میں غلطی کی ہے، زرتاج گل کو بھی درخواست دینی چاہیے۔فردوس عاشق اعوان نے کہا کہ شہریار آفریدی کی غلطی نہیں بلنڈر تھا۔ جو غلطی کرتا ہے وہ اپنی غلطی خود تسلیم نہیں کرتا۔ شہریار آفریدی نے خود کہا کہ مجھ سے غلطی ہوئی ہے۔ شہریارآ فریدی نے ووٹ پر دستخط اس لیے کیا کیوں کہ وہ ووٹ کی تصدیق کرنا چاہتے تھے۔

اس سے قبل حکومتی رکن شہریار آفریدی کا ووٹ بھی ضائع ہوگیا، شہریار آفریدی نے غلطی سے بیلٹ پیپرز پر دستخط کرلئے۔ جبکہ ریٹرننگ آفسر نے شہریار آفریدی کی گزارش کے باوجود نیا بیلٹ پیپر جاری کرنے سے انکارکر دیا۔ 

وزیر اعظم عمران خان نے شہریار آفریدی پر برہمی کا اظہار کرتے ہوئے کہا کہ آپ کو ایسی غلطی نہیں کرنا چاہیے تھی۔ سب کو طریقہ کار بتا دیا گیا تھا کہ ووٹ کیسے کاسٹ ہوتا ہے۔رہنما پاکستان تحریک انصاف (پی ٹی آئی) شہریار خان آفریدی وزیر اعظم کو تسلی بخش جواب نہ دے سکے۔

واضح رہے کہ آصف علی زرداری کی غلطی سے بھی بیلٹ پیپر خراب ہو گیاتھا ۔ جس کے بعد آصف علی زرداری نے ریٹرننگ افسر سے دوبارہ بیلٹ پیپر جاری کرنے کی گزارش کی۔ریٹرننگ افسر کی جانب سے آصف علی زرداری کو دوبارہ بیلٹ پیپر جاری کیا گیا۔ جس کے بعد سابق صدر نے اپنا ووٹ کاسٹ کر دیا۔