بہترین کارکردگی پر شیخوپورہ پولیس کے سات افسران کو اعزازات سے نوازا گیا

عدنان بھٹی سے

لاہور: انسپکٹر جنرل پولیس پنجاب عبدالکریم نے کہا ہے کہ امن و امان، سکیورٹی اور مؤثر سروس ڈیلیوری یقینی بنانے والے پولیس افسران فورس کا قیمتی اثاثہ ہیں، اور "محفوظ پنجاب وژن" کی تکمیل میں نمایاں کردار ادا کرنے والے افسران اور اہلکاروں کی حوصلہ افزائی کا سلسلہ جاری رہے گا۔

سنٹرل پولیس آفس میں منعقدہ تقریب کے دوران بہترین پولیسنگ، جرائم پر قابو پانے اور امن و امان برقرار رکھنے میں نمایاں کارکردگی دکھانے پر شیخوپورہ پولیس کے سات افسران کو تعریفی لیٹرز، اسناد اور نقد انعامات سے نوازا گیا۔

ایس پی انویسٹی گیشن شیخوپورہ غلام عباس کو تعریفی لیٹر اور نقد انعام دیا گیا، جبکہ ڈی ایس پی غلام مرتضیٰ ڈوگر اور ڈی ایس پی طارق الیاس کیانی کو بھی تعریفی لیٹرز اور کیش ایوارڈز سے نوازا گیا۔

اسی طرح انسپکٹر محمد نظام، انسپکٹر رضوان الٰہی، سب انسپکٹر غضنفر عزیز اور سب انسپکٹر منظور احمد کو بھی شاندار کارکردگی کے اعتراف میں تعریفی اسناد اور نقد انعامات دیے گئے۔

آئی جی پنجاب عبدالکریم نے کہا کہ پنجاب پولیس عوام کے جان و مال کے تحفظ اور امن و امان کے قیام کے لیے ہر وقت تیار ہے۔

تقریب میں ریجنل پولیس آفیسر (آر پی او) شیخوپورہ اطہر اسماعیل، ڈسٹرکٹ پولیس آفیسر (ڈی پی او) شیخوپورہ بلال ظفر شیخ، اے آئی جی ایڈمن اینڈ سکیورٹی فاروق سلطان سمیت دیگر سینئر افسران بھی موجود تھے.