کسی قیدی کو اتنی ملاقاتوں کی اجازت نہیں ملی جتنی بانی پی ٹی آئی کو دی گئی ، طلال چوہدری

اسلام آباد: وزير مملکت برائے داخلہ طلال چوہدری کا کہنا ہےکہ کسی قیدی کو اتنی ملاقاتوں کی اجازت نہیں ملی جتنی بانی پی ٹی آئی کو دی گئی ہے ،عمران خان پاکستانی تاریخ کے سب سے  وی آئی پی قیدی ہیں۔

تفصیلات کے مطابق سینیٹ اجلاس چیئرمین سید یوسف رضا گیلانی کی صدارت میں ہوا، جس میںپی ٹی آئی نے عمران خان سے ملاقات نہ کرانے کا معاملہ سینیٹ میں اٹھادیا۔

 پی ٹی آئی کے سینیٹر فیصل جاوید نے کہا کہ بتایا جائے بانی پی ٹی آئی سے ملاقات کب کرائی جائےگی؟

اجلاس میں اپوزیشن کی جانب سے اٹھائے گئے سوال کا جواب دیتے ہوئے وزیر مملکت داخلہ طلال چوہدری نے کہا کہ بانی پی ٹی آئی کو جیل میں تمام سہولیات مہیا کی گئی ہیں۔ فیملی کے علیحدہ اور پارٹی ممبران کی علیحدہ ملاقاتیں کرائی جا رہی ہیں۔

طلال چوہدری نےمزید کہا کہ بانی پی ٹی آئی پاکستان کی تاریخ کے سب سے وی آئی پی قیدی ہیں ، بانی پی ٹی آئی کے پاس 6 بڑی بیرکس ہیں ، ملک میں کسی قیدی کے پاس باورچی اور ایکسرسائز مشینیں نہیں ہیں۔

اپوزیشن پر تنقید کرتے ہوئے طلال چوہدری  نےکہا کہ سیاسی ڈرامہ لگانےکے لیے جیل رکھی ہوئی ہے ، یہ ڈرامہ لگانے کے لیے جیل کے سامنے بیٹھ جاتے ہیں۔

ان کا مزید کہنا تھا کہ پی ٹی آئی ضمنی انتخابات میں شکست کے بعد سیاسی ہمدردی سمیٹنے کی کوشش کر رہی ہے۔