غذائی قلت کا شکار فلسطینیوں کے لیے 100 ٹن امدادی سامان روانہ 

اسلام آباد: وفاقی حکومت کی جانب سےغزہ میں جاری اسرائیلی جارحیت کی وجہ سے غذائی قلت کا شکار فلسطینیوں کے لیے 100 ٹن امدادی سامان روانہ کردیا گیا۔

تفصیلات کے مطابق نائب وزیراعظم و وزیرخارجہ اسحاق ڈار اور چیئرمین نیشنل ڈیزاسٹر مینجمنٹ اتھارٹی ( این ڈی ایم اے ) نے امدادی سامان کی 17 ویں کھیپ روانہ کی۔

امدادی کھیپ اسلام آباد انٹرنیشنل ایئرپورٹ سے ایک خصوصی پرواز کے ذریعے روانہ کی گئی، جو عمان اور اردن کے راستے غزہ پہنچے گی۔

 امدادی کھیپ میں 65 ٹن تیار کھانا، 20 ٹن بچوں کے لیے خشک دودھ، 5 ٹن بسکٹ، اور 10 ٹن ادویات شامل ہیںجبکہ مزید 100 ٹن امدادی سامان آئندہ چند دنوں میں روانہ کیا جائے گا، جس کے بعد مجموعی امداد کا وزن 1,815 ٹن تک پہنچ جائے گا۔

اس موقع پر وزیرخارجہ اسحاق ڈار نےگفتگوکرتے ہوئے کہا کہ غزہ میں قحط سے چھوٹے چھوٹے بچے شہید ہورہے ہیں، اسرائیل خوراک کو بطور ہتھیار استعمال کررہا ہے۔

وزیر خارجہ اسحاق ڈار نےمزید کہا کہ مظلوم فلسیطینوں تک اشیائے ضروریہ کی بغیررکاوٹ ترسیل چاہتےہیں، ان کا کہنا تھا کہ پاکستان ہر حال میں فلسطینی عوام کے ساتھ کھڑا ہے اور ان کی ہر ممکن مدد جاری رکھی جائے گی۔

اسحا ق ڈار نے امدادی کارروائیوں میں شامل اداروں، خصوصاً این ڈی ایم اے اور الخدمت فاؤنڈیشن، کی فوری اور مؤثر خدمات کو سراہا۔

اس موقع پر فلسطینی سفیر نے بھی امداد کی فراہمی پر پاکستانی عوام اور حکومت کا شکریہ ادا کیا اور کہا کہ یہ جذبہ ہمیشہ فلسطینی قوم کے دل میں زندہ رہے گا۔